Awe riba dia internacional di Idioma Materno Departamento di Enseñansa Aruba (DEA) ta introduci un aplicacion pa busca con pa skirbi un palabra na Papiamento den e ortografia di Aruba riba e website www.papiamento.aw.
Esaki nan a anuncia den un relato.
Pa basta aña caba tin un lista di palabra publica riba e website [papiamento.aw] cu e usuario por download den e formato di pdf. Loke ta nobo ta cu awo bo por cuminsa type e palabra cu bo ta busca den un balki y e website mes ta mustra bo diferente palabra cu ta contene e letternan cu bo a type, asina DEA ta splica.
E aplicacion aki ta deriva di e lista di palabra skirbi segun e reglanan stipula den Ortografia di Papiamento – version april 2009 y publica den e Vocabulario Ortografico di Papiamento (buki blauw).
“Como base a haci uzo di un lista di palabra compila pa Mario Dijkhoff (d.f.m.). Un grupo di trabou di Departamento di Enseñansa Aruba, incluyendo algun miembro di otro departamento, a haci e trabou di evalua cua palabra ta forma parti di e lista aki y a pone e palabranan den e forma ortografico corecto. A base di comentario cu a drenta, a haci algun adaptacion na e lista, cu ta encera ampliacion y algun coreccion. E lista aki awo ta completamente incorpora den un aplicacion nobo riba e website”, segun nan.
Ta e intencion di gobierno di Aruba hunto cu e compania Setar pa den futuro crea tambe un mobile app pa auto coregi Papiamento den celular, e departamento ta bisa.
17.000 palabra
E Vocabulario Ortografico di Papiamento ta un lista cu ta contene mas cu 17.000 palabra. “Meta di e publicacion ta pa yuda e usuario ora e kier sa con pa skirbi palabra segun e ortografia di Aruba. E vocabulario ta inclui palabra cu ta wordo uza tur dia, pero tambe algun palabra di antaño, nomber di mata, pisca y algun nomber geografico. No mester considera e vocabulario aki como un lista completo di tur palabra na Papiamento. Den transcurso di tempo e lista lo sigui crece”, segun DEA.
