(Infobae) – Riba dia 16 di e desaparicion di e submarino Argentino ARA San Juan, armada Argentino a emiti un mensahe nobo relaciona cu buskeda di e submarino.
Segun e vocero di e forsa militar, Enrique Balbi, a declara, ya a cubri casi 100% di e area operativo y a anticipa cu nan ta analisando cuatro contacto cu a detecta cu e sensornan den fondo di lama. Ta trata di obheto detecta pa e sensor y sistemanan di rastreo. Ta wardando e yegada di e mini submarinonan pa realisa e inspeccion visual.
E militar a precisa cu e barconan cu ta traha den e buskeda di e submarino tabatin seis contacto cu algun tipo di elemento den fondo di lama, y cu dos di nan a wordo descarta pasobra ta trata di barco hundi.
Segun Balbi a splica durante un conferencia di prensa nobo, un di e imagennan ta di un barco Chines cu a drenta ilegalmente na lama Argentino y su propio tripulacion, ora a descubri nan, a haci cu e barco a naufraga.
E otro, no registra riba e mapa nautico, ta trata di un barco destina na pesca di calamar. Balbi a aclara cu ambos ta den e zona economico exclusivo di Argentina.
E vocero a afirma ademas cu Marina ta bay pidi disculpa si algun famia di e tripulantenan di e submarino ARA San Juan a keda pafo di e plan di yamada implementa pa informa di e decision di declara e etapa di buskeda pa finalisa.
Finalmente Balbi a reafirma cu buskeda activo di ARA San Juan ta continua, pero a aclara cu ayera a termina e etapa di buskeda y rescate pasobra e informacion reuni y e tempo transcuri ta indica ‘incompatibilidad cu bida humano.’
