Parlamento, ministernan y pueblo mester dialoga riba cambionan den ley di AZV
Seguro nacional di gasto medico general AZV ta splica kico nan retonan ta encuanto balansa fondo y tratamento pa un grupo amplio di pashent. Alabes e organo ta splica cu den futuro lo ta posibel pa inclui psicologia y psikiatria den pakete di AZV.
AZV ta informa cu ley di AZV ta exigi cierto rekisitonan pa cuido segura pasobra segun vocero di AZV Solange Tchong, asina por percura cu cuido lo por wordo cubri pa hopi pashent. Esaki ta algo cu tambe director di AZV Anco Ringeling a yega di expresa na e matutino aki den pasado. E punto cu sr. Ringeling a trece dilanti aña pasa ta cu ley di AZV a wordo crea conscientemente cu e limitacion cu mester trata di un cuido ‘comun y coriente’ mescos cu den otro paisnan su seguronan colectivo pa asina percura cu no djis cualkier tratamento arbitrario lo por wordo cubri por medio di AZV.
E reto segun sra. Tchong ta pa un pais chikito manera Aruba por financia cuido pa un grupo di mas o menos 107 pa 110 mil persona sin tin acceso na industrianan farmaceutico cual hopi biaha paisnan mas grandi por uza pa financia cuido medico pa un populacion grandi. “Otro paisnan tin acceso na industrianan grandi of otro herment cu lo por cubri e aspecto di research. Aruba no tin esey. Aruba por ehempel no tin ni un universidad medico cu tin esey. Hulanda cu ta un pais relativamente chikito, hasta tin esaki.”
Esaki sra. Tchong ta splica pa ilustra cu e casonan excepcional cu a tuma luga den 2017 ta exactamente esaki: casonan masha excepcional cu normalmente no lo tuma luga. Den nos edicion anterior nos a reporta cu AZV ta habri pa mira algun cambio den e ley di AZV, cual awo ta existi pa basta tempo. Sinembargo tin algun aspectonan di ley cu lo ta miho pa laga manera cu ta, ‘pa bo por proteha bo mes como isla’.
Financiamento seguro medico nacional
E fondonan cu AZV tin disponibel pa cubri experimentonan, innovacion of otro tipo di tratamentonan experimental ta bastante limita. Otro paisnan si tin manera pa financia esaki segun sra Tchong pasobra nan tin fundacionnan y companianan cu hopi biaha tin meta comercial cu e financiamento aki, pero na Aruba no tin acceso na esaki.
Alabes sra. Tchong ta reconoce cu por bin mas combersacion, esta colectivamente entre pueblo, parlamento y ministernan riba e cambionan posibel den ley di AZV, particularmente riba e contenido di e pakete cu e seguro nacional ta ofrece.
Un ehempel cu e vocero ta duna ta e cantidad di ora di fisioterapia cu AZV ta ofrece. Sra. Tchong a yega di tende hopi riba e topico aki y e mes como persona (pues no papiando como vocero di AZV) ta haya cu en berdad e 1 of 2 ora cu AZV ta duna no ta suficiente compara cu otro paisnan afo cu ta duna 8. “Aworaki AZV ta existi pa 17 aña. Porta ta tempo pa renoba y actualisa nos sistema”.
AZV lo por inclui psicologia den nan pakete si ley wordo cambia
Un di e maneranan cu e seguro nacional ta purbando di mehora e sistema di salud na Aruba ta por medio di e sistema di salud mental. Manera nos a trece dilanti anteriormente un acuerdo a wordo cera entre Fundacion Respaldo y PAAZ pa pasa cuido psikiatrico pa e fundacion. Den e proceso aki AZV ta hunga un rol grandi por medio di entre otro financia e procedura.
E vocero ta conta nos con den añanan 90 ya caba tabatin pensamento pa restructura e cuido di salud mental na Aruba pa asina trece esaki di un manera mas coherente. “E no tabata mucho visibel ni accesibel pasobra bo mester a pasa diferente instancia, pero actualmente AZV e fundacion y hospital ta canando caminda pa mehora esaki.”
Aunke psicologia no ta forma parti di e pakete cu AZV ta ofrece actualmente, di e manera cu lo bay organisa esaki e lo por bay bira parti di e pakete. Aunke normalmente mester ta un escogencia personal pa haci uzo di e servicionan di psicologia y psikiatria, ora esaki wordo restructura lo por bay ofrece un servicio multidisciplinario pa primeramente grupo di persona ambulante riba caya. Pues no lo tin acceso pa tur hende den cuminsamento, pero si pa esnan cu tin mas necesidad.
Si e seguro lo por ofrece e tipo di cuido aki como parti di nan pakete pa henter pueblo di Aruba, sra. Tchong a bolbe mustra riba e cambionan di ley cu lo mester tuma luga pa haci esaki posibel. Pues nos lo tuma contacto cu e mandatario concerni y clarifica riba su punto di bista encuanto esaki.
“Nos ta pensa cu esaki ta un bon inicio. Bo mester sigui desaroyonan actual pa asina por trece cambio.”
