Awe merdia directiva di SIMAR ta bay haya un presentacion for di oficina di minister di Enseñansa riba e proceso pa haci di Dienst Publieke Scholen (DPS) un fundacion. Igualmente awe nochi SIMAR tambe tin un reunion informativo cu nan miembronan den nan sede relaciona entre otro cu e topico aki y tambe riba restructuracion salarial di e docentenan.

Ya caba siman pasa SIMAR a yega di reuni cu e mandatario di enseñansa riba su vision pa bin cu un cambio den DPS, y nan ta spera cu e presentacion di awe merdia por trece ainda mas claridad. Aunke sindicato SEPPA tin mayoria di e docentenan ambtenaar bou di nan, SIMAR tambe tin un grupo di alrededor di 150 miembro di e sector di enseñansa di scol publico.

Presidente di SIMAR, Sheila Tromp a bisa cu nan preocupacion mas grandi tin di haber cu e posicion huridico di e docentenan cu ta traha pa scolnan publico. Te ainda SIMAR ta haya hopi prematuro pa bin cu un posicion cla of punto di bista riba e cambio cu minister di enseñansa kier implementa den DPS. Nan ta spera cu algun puntonan importante ta wordo aclaria den e presentacion di awe merdia. Nan kier compila tur informacion cu ta posibel rond di e asunto aki pa nan por trece esaki cu mas claridad cerca su miembronan awe nochi.

Otro punto cu SIMAR ta hopi interesa pa wordo trata cu minister di enseñansa tin di haber cu e asunto di restructura salarial. Nan ta persisti pa e wordo poni den e agenda di nan reunion di awe merdia. Ya cu e sindicato tin hopi aña wardando riba implementacion di esaki, y te hasta asina leu na luna di september ultimo, e ley aki por a pasa den parlamento.

E anuncio riba e cambio di status den DPS a trece consternacion riba tereno di enseñansa ya cu den medionan social ta wordo divulga informacionnan cu por produci preocupacion cerca e docentenan. P’esey SIMAR ta prefera di por haya informacion concreto y fidedigno durante e presentacion organisa pa oficina di ministerio di enseñansa na Bestuurskantoor.