Miles di vivienda a keda destrui na Bolivia pa yobida intenso, cu 57 municipio den alerta di emergencia pa e tempo malo, y cu mas di 17.000 famia afecta.
E cifra por aumenta pasobra ta spera mas precipitacion ainda.
Seis di e nuebe departamentonan di Bolivia a keda seriamente afecta debi na e yobidanan extremo. Di acuerdo cu e Servicio di Meteorologia e clima lo keda instabil. Tambe ta registrando miles di hectar di tereno cu cultivo afecta.
Senador opositor Yerko Nuñez a declara cu a evacua hopi hende pasobra nan no por a keda den nan cas mas. El a bisa tambe cu a pidi gobierno nacional, defensa civil y gobernacion di e departamentonan pa nan ta presente pa apoya e famianan aki.
“Nos no ta custumbra di tin yobida di mas di 10 o 12 ora. Sigur cu esey tin di haci cu e deforestacion den Amazonia Boliviano”, Nuñez a conclui.
Debi na e efectonan di e yobidanan intenso, desborde di rio, awa y lodo na Bolivia, a haci e declaracion di emergencia facilitando e desembolso inmediato di recurso. Sin embargo, e empresarionan di e region afecta ta mustra preocupa pa e consecuencia di esaki pa economia di e pais.
“E daño cu nos ta sufri, no ta e sector agroproductor so, ta sector di comercio, sector di transporte, di industria, esaki ta afecta varios sector. Ainda nos no por cuantifica e perdidanan cu tin pasobra e parti pio no a pasa ainda,” e presidente di e confederacion di empresario priva di Bolivia, Ronald Nostas, a bisa. Sin mbargo, ministro di economia, Mario Guillen, ta prefera di no descarta ainda ningun posibilidad. “E eventonan climatico aki no mester afecta e crecemento economico di manera importante”, el a declara.
