E topico di e color oficial di bandera di Aruba atrobe ta yegando cerca. Den cuadro cu 18 di maart cual ta nos fiesta nacional venidero, ministerio di cultura ta laga sa cu mas cu claro nan kier pa e informacion bini dilanti di na momento cu esaki a cuminsa e tempo di Betico, te cu awor. Pa pueblo por ta informa di henter e proceso den su totalidad, y tambe e ta na su luga pa e cambio aki wordo haci cu un referendum segun minister di Financia Xiomara Ruiz- Maduro (MEP).
“Ora bo ta yega na bandera di bo pais, bo ta toca cu alma di un pueblo. Anto ora bo ta toca cu alma di un pueblo, bo no por tin e pretension manera minister, of parlamentario individual, ni tampoco den constelacion di parlamento, di pensa cu bo tin un autoridad di mishi cu esaki sin cu bo ta consulta cu e pueblo adecuadamente”, el a expresa. Esaki e ta bisa cu ta palabranan cu fraccion MEP a yega di trece den Staten y ripiti e tempo eynan pa minister Otmar Oduber (POR) ora e tabata encarga cu turismo y kende awe ta nan colega.
Referendum
E mandatario ta subraya cu cambionan den nos bandera lo mester tuma luga via un referendum caminda cu pueblo adecuadamente ta wordo informa. “E referendum no por yega di awor pa 18 di maart, e no ta realistico”, e minister ta bisa. Locual si ta realistico y ta den man di gobierno ta cu ya caba den e proceso bayendo na e luna di celebracion di nos bandera, comunidad di Aruba a wordo adecuadamente informa pa forma un opinion y tuma un decision. E coalicion lo mester bini hunto y tur e decisionnan aki lo mester wordo haci conhuntamente cu pueblo segun minister Ruiz-Maduro. “Esaki ta un discusion cu nos tin cu hiba bon informa, no solamente a base di emocion, pero mas caminda nos ta saca e informacion di locual nos tin den nos archivonan nacional. Y nos ta papia y traha un programa cu esunnan cu te ainda Dios a duna nan bida, y cu tabata presente den e comision ey pa nan trece dilanti con e bandera aki a yega y ki pasonan pa tuma.” E mandatario ta bisa cu esaki pues lo mester bira e decision oficial pa nunca mas den historia lo bin un discusion si esaki ta e color of no ta e color di nos bandera.
Discusion riba color
E discusion algun aña pasa tabata cu e color actual no ta existi mas, e color United Nations Blue.Sin cu drenta den ningun detaye anticipa riba e programa na caminda, e mandatario encarga cu cultura ta bisa cu tin henter un storia tras di pa kico e discusion aki a bira mas grandi. Manera e por ta conoci cerca algun hende, Betico Croes a hipoteca su cas e tempo ey pa asina por a busca e prome banderanan.
Nan no por a haya e bandera cerca un solo pais, pues esaki a bini for di diferente pais cu a trece nan aden y parti nan como prome bandera. P’esey kisas bo tin un hende grandi awe cu e tin e prome bandera, un otro lo bisa cu ta e tin e cu tal color, pero Nacionnan Uni a cambia esaki. Y riba dje tin un otro punto tambe caminda tin un parti cu nan a print 297. Kiermen den historia di nos pais, sigur pa locual ta e parti di nos bandera, tin hopi informacion cu nos pueblo sigur esunnan mas jong no tin e informacionnan aki.
Minister Ruiz-Maduro: “Dia di locual a bira e debate den sala di parlamento, hopi di e informacionnan aki no tabata tin. Y p’esey e dia ey mi a bisa minister Oduber cu bo no por pretende di haci e parti akinan. Y e ta algo cu tabata mi pensamento cu mi a vocifera tambe den parlamento. E ta un pensamento caminda cu bo ta respeta e alma di e pueblo aki, p’esey bo tin cu consulta cu e pueblo aki y no pa crea discordia cu ningun hende.”
