Secretario di Estado di Merca, Rex Tillerson, a sigura cu Colombia lo ta e piesa clave den e restauracion di democracia na Venezuela y el a habri e posibilidad di reorienta e ayudo destina na e pais petrolero, pa e ciudadanonan cu a busca refugio na Colombia.
“Colombia tabata un hungado importante pa restaura democracia na Venezuela nos a intercambia idea di con nos por traha cu otro pais di region a traves di e Grupo di Lima y di OEA pa restaura democracia na Venezuela”, Tillerson a bisa na Bogota, unda el a reuni cu presidente Juan Manuel Santos.
Den e sentido aki, Tillerson, cu ta riba un gira regional, a agrega cu e unico obhetivo di Merca ta ‘logra cu Venezuela bolbe respeta su institucionnan’ y organisa eleccion liber y husto pa e pueblo Venezolano por expresa su opinion. Tillerson a bisa tambe cu ta kibra su curason di mira con e crisis Venezolano tin efecto riba Colombia.
Segun e ultimo estadistica di gobierno Colombiano, como 550.000 Venezolano a yega na e pais y como 37.000 ta yega tur dia, algun di nan buscando articulo di primera necesidad y hopi otro pa huy di e crisis den cual e pais ta biba. Ademas, e secretario di Estado a agrega cu mientras esey ta sucede, e situacion na Venezuela ‘ta sigui deteriora’.
Ta p’esey el a sigura cu lo sigui traha “manera socio enfrentando un tragedia di cual ambos ta testigo.”
Referiendo na un posibel ayudo economico, el a splica cu Merca a destina cierto recurso pa enfrenta e situacion humanitario dentro di Venezuela.“No tabata facil pa e situacion cu ta reina, anto nos por dirigi e ayudo aki na e Venezolanonan cu mester a bandona Venezuela y bin Colombia”, Tillerson a declara, sin cuantifica e cantidad.
Finalmente, e la splica cu ta bay analisa e posibilidad di uza e recursonan di e manera ey, ya cu Washington ta reconoce cu e yegada di e Venezolanonan ta un peso grandi pa Colombia.
