Home Regional Colombia: Welga di compania di recoge sushi ta causa problema na Bogota

Colombia: Welga di compania di recoge sushi ta causa problema na Bogota

177

(Infobae/AFP) – Alcalde di Bogota, Enrique Peñalosa, a declara diahuebs pasa un emergencia ambiental y sanitario na e capital Colombiano pa un protesta di e trahadonan cu ta piki di sushi cu a  impedi e lantamento di toneladanan di residuo.

“Ta bira necesario decreta emergencia ambiental y sanitario pasobra  nos tin e obligacion di proteha bida y salud di e ciudadano y naturalmente, cu tur e toneladanan di sushi cu no a recoge, ta pone e salud di e poblacion na riesgo”, e mandatario a bisa den un rueda di prensa.

A tuma e medida despues cu un grupo di trahado di e empresa distrital Aguas de Bogota, cu ta recoge sushi den 12 di e 20 localidadnan di e ciudad ,”a afecta e prestacion di servicio” parando nan actividadnan y atacando trucknan di sushi”, el a agrega.

E empleadonan ta protesta desde diaranson pa e cambio di schema den e modelo di limpiesa cu e alcalde ta implementa y cu segun nan lo laga 3.700 trahado sin trabao.

Segun Peñalosa, den e localidadnan unda Aguas de Bogota ta opera, ta piki 2.700 di e 6.300 tonelada di sushi cu ta recoge tur dia na e ciudad aki di ocho miyon habitante. Den e luganan unda e compania ta opera ta biba mas di 1,5 miyon abonado, el a afirma.

“Nos ta bay uza tur e medionan necesario pa pone orden. Di ningun manera nos ta bay permiti cu e grupo minoritario violento aki ta bay comete sabotahe y ta impedi cu nos ta cumpli cu limpiesa di ciudad”, el a indica.

Ora declara emergencia sanitario y ambiental, e alcalde tin e facultad pa “haci e contratacion necesario prome cu e entrada den funcionamento di e empresanan operador,”cu lo inicia trabao den 12 dia, segun e alcaldia a splica den un comunicado.

Pa enfrenta e protestanan, gobierno di e ciudad a haci contratacion di personal y vehiculo, y ademas ta conta cu truck di ehercito pa duna e servicio.