‘Comercio mester ta mas habri pa tuma hendenan cu cierto limitacion’

Ayera na Renaissance Convention Center, e fundacion  cu ta encarga cu cuido na hendenan cu limitacion a tene un celebracion di carnaval cu tur nan diferente departamentonan. Combersando cu nan nos a toca riba diferente tema relaciona cu cuido di nos hendenan cu limitacion, incluyendo nan luga den sector laboral/comercio cual hopi biaha no ta bay facil.

Ayera pa di 18 aña Renaissance Convention Center a brinda nan luga completamente gratis pa e fundacionnan encarga cu cuido di hendenan cu limitacion por celebra carnaval. Pa e clientenan aki, locual cu ta musica, esaki ta nan bida segun cabesante di Centro Man Na Obra Elvira Tromp. Anto e tabata notabel tambe ayera ora cu diferente clientenan for di edadnan jong te cu mas grandi tabata bailando y disfrutando di e evento. Rusty cu su grupo a presenta ayera pa e ambiente musical, tabata tin un lunch y den general un momento agradabel pa e departamentonan pasa hunto.

Cada departamento bao di e fundacion Stichting Verstandelijk Gehandicapten Aruba (SVGA) tin su meta specifico cu kier logra. Den caso di di Man Na Obra, nan meta ta pa nan personanan cu limitacion por drenta e mercado laboral. Caminda cu nan ta bisa cu un persona cu limitacion intelectual tambe tin derecho pa haya trabao na su nivel.

Comercio por ta mas habri
“Cada persona tin nan smaak, tin kier bay den area di hotel, otro ta bisa cu e kier por ehempel laba auto. Otronan kier bay den e mundo comercial of fastfood, nan tambe tin nan deseonan segun sra. Tromp ta splica nos. “Asina nos ta purba di wak toch pa pone nan unda nan ta gusta. No ta tur ora e ta logra, no ta tur ora e ta bay facil.”

E cabesante ta bisa nos cu tiki tiki comercio ta habriendo porta pa duna nan e oportunidad. Pero ora nos a puntr’e con esaki ta bayendo actualmente, e ta bisa nos cu ‘e por ta mas.’ Man Na Obra ta canando nan caminda y ta djis spera cu e portanan ta sigui habri pa esnan cu limitacion  por haya mas oportunidad. “Nos ta buscando mas luga unda nos clientenan por traha, anto tin luganan cu ta hopi habri manera Kooyman mes. Tur siman pa un par di dia tin un grupo di nos cu ta bay traha eynan cu guia. Pero tin cliente cu si haya training, nan por bay traha nan mes pa un salario y esey ta hopi importante,” directora di SVGA Els van Homelen ta bisa Bon Dia.

Tin diferente cooperacion andando caba manera cu habon Aruba y Fantastic Gardens. Trampolin Pa Trabao ta un otro fundacion cu tambe tin yen conexion den comunidad pa yuda hendenan cu limitacion haya trabao. “Nos mester ta visibel pues e ta importante, y nos ta wak cu e cliente ta gosa di e trabaonan,” segun sra. van Homelen.

Crisis plan di gobierno
SVGA ta contento di por ta participando den e crisis plan di gobierno pa locual ta desaroyonan nobo den e parti social na Aruba. Pasobra esaki sigur ta conta pa nan clientenan na SVGA pa bin mas facilidadnan. Pasobra un mucha ‘normal’ ainda si e no ta den un bon situacion na cas e por bay Casa Cuna of Imelda Hof. “Pero no tin ningun manera pa saca nos muchanan for di un famia si ta realmente necesario. En principio bo kier pa tur mucha lanta cu nan mayornan. Pero si esey no por pa nan wordo protegi, e ora mester tin un alternativa,” segun sra. van Homelen.  Esaki ta conta pa nan muchanan, pero nan adultonan tin masha tiki luga pa nan por biba otro luga cu no ta cerca nan mayor/familiarnan. Pues e ta realmente hopi necesario segun e directora pa tin mas oportunidadnan.

Tur organisacion cu ta wordo subsidia por medio di gobierno pa cuido di hendenan cu limitacion, a sinta hunto y mira kico ta necesario pa brinda e proteccion pa nan hendenan – cu no ta pa mucha y hoben so pero pa henter nan bida. Aunke cu nan ta adulto nan mester ayudo di comunidad. “Nos ta hopi cerca di gobierno y director di Asuntonan Social pa realmente stress pa e bay door.  Pasobra nos ta contento cu e gobierno aki ta realmente mustra dispuesto pa haci algo pero ya, nos mester wak pa e bira un realidad pues e placa mester bin riba mesa.”

Otro alternativanan
E centro di cuido na San Nicolas tin ocho aña cla caba unda tin tres casnan pa hendenan cu limitacion. Ainda nan ta bashi. “E ta solamente un cos di drecha e luga un tiki y yena e luga. Mester pone personal anto e ora tin luga pa e muchanan. E ta hopi facil pero e mester wordo haci,” segun sra. van Homelen. Un otro proyecto cu a wordo skirbi den e crisis plan tambe ta pa bin cu casnan na SVGA mes.  Pa hendenan cu por ehempel tin algun problema di comportacion y cu ta funciona poco abao cu mester extra cuido. Aña pasa tabata tin crisisnan fuerte no solamente na SVGA pero den otro partinan tambe cu problemanan cu pashentnan psikiatrico. “Nan mester cuido, bo mester proteha bo comunidad anto e persona mes,” sra. van Homelen ta bisa.

E fundacionnan ta bisa cu nan a constata cu nan mester optimalisa nan cooperacion cu otro cu ta hopi importante.  Pa sinta hunto pa mira con por traha bon hunto y brinda miho servicio y cuido cu ta dunando caba. Bo mester hende cu ta realmente gusta e trabao y stima e hendenan, anto te awor segun sra. van Homelen nan ta logrando bon cu e parti aki. “Normalmente nos ta haya basta hende cu ta solicita cerca nos si. Awor nos tin par di vacatura; pa un psicologo y ortopedagogo pues si tin hende interesa please acudi cerca nos. Pasobra esey ta realmente hopi necesario.”