Durante un encuentro cu Bureau Leerplicht recientemente cu tur cabesante di scol primario na Aruba, un di e puntonan discuti tabata riba muchanan yegando scol laat. A dicidi cu lo bin un control mas severo riba esaki.
Kenneth Jong di Bureau Leerplicht ta splica Bon Dia Aruba cu hopi biaha pa actua manera debe ser ora cu un mucha no ta bin scol, nan ta haya nan mes cu man mara. Nan a recientemente discuti esaki cu cabesantenan di scol hunto cu varios otro punto di importancia manera nos a trece dilanti e siman aki.
Sr. Jong ta conta nos cu nan a discuti algun di e cosnan aki cu e minister nobo actual encarga cu enseñansa den un encuentro cu e ministerio hunto cu henter e bureau den november di aña pasa. Den e encuentro aki cu e cabesantenan y Bureau Leerplicht na comienso di februari, a bin dilanti tambe e punto di control mas severo na muchanan cu ta yega laat scol. Pasobra den ley tambe ta para cu e cabesantenan di scol tin e obligacion di nota ausencia, pero tambe e tin e obligacion di nota ‘te laat’.
Anto ora esaki cuminsa bay for di man cu e muchanan ta constantemente keda yega laat -depende con leu nan a yega despues di sinta cu mayornan y trahadonan social- pa nan por yama Bureau Leerplicht tambe pa sinta cu nan y pa asina pone mas presion riba e mayornan por ehempel. Cosnan manera accionnan cu sticker ta wordo haci unda ta motiva e muchanan pa bay scol y yega trempan, pero awor Bureau Leerplicht ta evaluando otro cosnan tambe cu por wordo haci y kico tin mas efecto.
Control na supermercadonan y otro partinan
Tambe tin e parti di control na supermercadonan of muchanan cu Bureau Leerplicht mes ta haya ora cu nan ta sali core rond na cualkier caminda, pa toch para y puntra dicon nan no ta na scol. E parti di supermercado of otro areanan mester bini cu polis pasobra nan tin e autoridad pa actua, y ta check cu Departamento Labor pa wak dicon e mucha ta trahando. “Tin henter un proceso cu tambe den pasado nos a hacie, anto nos ta cuminsa poco poco atrobe ripiti sigur esunnan cu a trece exito. Nos a palabra cu e cabesantenan cu nos lo sigui den contacto cu nan pasobra den busca solucionnan no ta solamente nifica cu nos ta bay pone cierto reglanan. Pero nos mester scucha e veld tambe pasobra nan tambe tin solucionnan/ideanan pa nos”, sr. Jong ta splica.
Link cu Censo
Un otro punto cu a wordo treci dilanti recientemente ta si Bureau Leerplicht tin bista riba e muchanan entre 4 cu 16 aña en general. “Nos mester tin un link cu Censo unda sikiera nos por haya ken ta e muchanan cu mester bay scol obligatorio, pues entre 4 – 16 aña ta. Unda si bo tende algo bo por verifica y busca mas informacion unda cu nos por actua”, sr. Jong ta bisa. Den nan encuentro cu ministerio di enseñansa na final di november, Bureau Leerplicht a priminti di trece e preocupacionnan di e cabesantenan di scol dilanti den un siguiente encuentro cu e minister. Esey awor ta riba papel na caminda pa wordo concretisa segun sr. Jong pa asina e pasonan cuminsa wordo tuma.
Otro puntonan
Un parti cu Bureau Leerplicht a scucha for di e cabesantenan di scol ta cu hopi biaha nan ta sinti manera nan no ta wordo tuma na serio. Ora cu muchanan por ehempel ta bay afo por ta pa vakantie of otro motibo, y nan ta keda hopi tempo. Nan ta pidi pa por ehempel bay afo pa un par di siman y scol ta nenga nan, pasobra ora bo pidi, bo mester yena cierto formulario. Scol ta nenga e peticion pasobra nan kier bay durante temporada di scol, Bureau Leerplicht y Inspectie Onderwijs tambe ta nenga nan, pero toch nan ta sali.
Pasobra no tin un presion riba nan of un tipo di straf/medida cu por pone nan no sali. Riba e parti aki tambe e cabesantenan cu Bureau Leerplicht mester a dialoga basta un rato anto intercambia algun idea, como tambe presenta esaki na minister. E mandatarionan encarga cu enseñansa como tambe inmigracion lo mester haci cierto palabracionnan cu ora nan wak un mucha entre 4-16 aña ta sali, a pesar cu ta cu mayor of voogd, pero cu e mester por mustra un documento firma oficial cu e mucha ta permiti pa sali for di Aruba. “Esey tambe nos tin cu regla cual na mi aparece no ta tuma hopi tempo pa concretisa algo asina.”
Ley di leerplicht
Sr. Jong ta splica nos cu e enfasis un biaha mas Bureau Leerplicht ta pone y cu mucho gusto lo haci e trabao ta pa haya datonan concreto di parti di e cabesante, trahado social, fundacion cu a manda cierto dato unda cosnan bay for di man pa Bureau Leerplicht actua. “Den e ley di leerplicht nos ta traha cu ausencia di muchanan cu no ta bayendo scol pa tanto tempo. Nos ta purba conhuntamente cu e cabesante pa wak kico a pasa y nos tarea hunto ta pa pone e mucha bek na scol. Cu guia di otro instancianan e mucha ta sigui bin scol, cual ta nos tarea tambe di sigui monitor e situacion. Nos hunto cu e team di scol.” Sr. Jong ta splica cu e ley di leerplicht su parti cardinal ta cu e mucha tin derecho na enseñansa. ” E ta sigui bisa: “E ta nos tarea pa duna e mucha su derecho, gui’e hunto cu trahado social of partnernan pafo di scol pa pone e mucha bek na scol.”
