Cuba ta dilanti un cambio generacional den gobierno den circunstancia dificil  y cu un poblacion menos interesa den politica, segun e cifranan preliminar di eleccion parlamentario di diadomingo pasa ta revela. Solamente 82,9% di e votantenan a bay na e urnanan, e cifra mas abao di participacion desde e prome eleccion di e Poder Popular na 1976.

Na mes momento e dia a sirbi pa pone Miguel Díaz-Canel, prome vice-presidente y posibel sucesor di Raul Castro den e centro di atencion, mientras e actual presidente a haci un recorido di poco atencion publico na Santiago de Cuba, unda segun e rumornan e lo por bay biba si e retira di gobierno na april, manera el a bisa. E Asamblea Nacional eligi diadomingo mester ratifica e hefe nobo di gobierno dia 19 di april proximo.

Otro cifra preliminar di diadomingo ta indica cu gobierno ya no por alcansa e unanimidad di anterior eleccionnan. Ademas di e 17,1% cu no a vota, di mas di 8 miyon registra pa vota, casi 20% no a vota pa tur e candidatonan riba e biyete, desafiando e slogan di un voto ‘uni’ promovi pa prensa oficial y gobierno.

E Comision Electoral Nacional (CEN) a informa dialuna den un conferencia di prensa cu 94,42%di e votonan tabata valido, un contraste cu loke tabata sucede den pasado unda e suma di voto anula o blanco tabata alrededor di 10%.

Opositornan liga na e campaña Cuba decide, lidera pa Rosa Maria Payá, a pidi e Cubanonan pa invalida e biyetenan. Pero segun e cifranan preliminar a anula solamente 1,26% tabata invalido.  Miembronan di e Comision Electoral Nacional no a duda den cualifica e eleccion como un ‘un triunfo’ y ‘un re-afirmacion di e sistema electoral Cubano’.

E presidente di CEN, Alina Balseiro Gutierrez, a bisa cu e cifranan por cambia ainda pasobra a añadi mas di 300.000 inscripcion di ultimo ora na e registro electoral.

Diadomingo pasa e Cubanonan tabata por a ratifica e candidatonan di e asamblenan provincial y 605 candidato pa diputado di Asamblea Nacional, pero no scoge entre candidatonan rival. Si tur e candidatonan riba e formulario ricibi mas di mita di e votonan valido, tur lo ta eligi y esey a sucede tambe, segun CEN.