E yiu mayor di Fidel Castro, Fidel Castro Díaz-Balart, a comete suicidio diahuebs ultimo na Habana. E tabatin 68 aña di edad, segun publicacion di e site oficial Cubadebate.
Di acuerdo cu e publicacion, Castro Díaz-Balart tabata sufri di “un estado depresivo profundo” pa cual “e tabata ser atendi pa un grupo di medico desde varios luna.”
“Parti di su tratamento tabata rekeri inicialmente un regimen di hospitalisacion y despues e tabata ricibi tratamento ambulante durante su rehabilitacion social,” Cubadebate a detaya.
Na momento di su morto, Castro tabata funciona como asesor cientifico di e Conseho di Estado y Vice-presidente di e Academia di Ciencia di Cuba.
Castro Díaz-Balart tabata e unico yiu di e prome matrimonio di Fidel Castro cu Mirtha Díaz-Balart y tabata conoci como ‘Fidelito’.
E publicacion ta conclui cu e observacion cu “su acto funeral lo ser organisa segun decision familiar.”
