Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta. Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votado por keda informa y tin un bista mas amplio pa yuda bo cu bo decision di voto. Awe nos ta continua cu partido Cristiannan Uni Reforsando e Potencial di Aruba (CURPA).
CURPA – Reforsando potencial di e ciudadano
Presidente di partido Curpa Robert Anjie ta kere cu Aruba su potencial ta su ciudadanonan. “Cada hende tin un habilidad, un talento cu Dios a duna nan. Nos ta kere si hende haya un oportunidad pa haci uzo di nan talentonan, conhuntamente como pais nos por logra cosnan grandi.” E partido aki ta uno primeramente Cristian cual segun sr. Anjie ta para riba normanan y balornan di Dios. Nan a recientemente anuncia tres candidato nobo y ta casi completando nan lista di candidatonan. “Nos idea ta pa pone candidatonan riba e lista cu tin temor di Dios. Esey ta haci nos diferente cu e otronan pasobra ora bo tin temor di Dios bo no ta haci cierto cosnan cu bo ta haci.”
Organisacion ta mas grandi
E partido aki a dicidi cu nan ta bay participa den e eleccion 2017 como dos luna pasa segun e presidente ta conta nos. Nan plan ta pa yega na tur skina di Aruba. Nan a participa na eleccion di 2009 cu e meta pa participa y pone nan stempel politico. “Nos no a logra yega cerca tur hende e tempo ey. Aworaki nos tin un organisacion mucho mas grandi cu hopi hende cu kier yuda.”
Nan ta preparando y basicamente cuminsando cu nan programa di campaña caba. Nan lo tin programa di radio diariamente cuminsando otro siman di 3-4 pm na Hit 94, y tur diasabra di 2-3 pm pa yega na e radio oyentenan. Lo organisa actividadnan deportivo, actividadnan den bario y reunion di contactonan. Sr. Anjie: “Pa nos yega mas cerca posibel di tur hende na Aruba, pa tur hende conoce Curpa como un partido alternativo.”
