E ‘conseho ciudadano di siguridad publica y husticia penal, un organisacion no gubernamental Mexicano ta sigui desaroyo mundial di violencia y ta entrega informe tocante, entre otro, e cantidad di homicidio pa cada 100.000 habitante di pais y ciudad.
Segun nan ultimo publicacion, e ciudad di Los Cabos na Baja California Sur tin e dudoso honor di ta e ciudad cu mas morto violento, cu un promedio di 111,33 homicidio pa cada 100.000 habitante. Cerca ta sigui na di dos luga Caracas, Venezuela, cu promedio di 111,19, y na di tres luga otro ciudad Mexicano, Acapulco, cu un promedio di 106,63. E promedio di e lista total tabata 59,17 pa cada 100.000 habitante.
Entre e prome dies ciudad riba e lista ta aparece solamente ciudad Latino Americano, entre nan cinco di Mexico (Los Cabos, Acapulco, Tijuana, La Paz, y Victoria). Dos ta di Venezuela: Caracas y Ciudad Guayana. Brasil tambe ta score bon den e competencia inboluntario aki: Natal, Fortaleza y Belem. Tin un motibo naturalmente pa e interes y preocupacion Mexicano pa e topico di violencia aki: riba e lista di e 50 ciudadnan mas violento na mundo, cu no ta den un situacion di guera, ta aparece no menos cu 12 ciudad di e pais aki. Sinembargo, Brasil ta hiba e corona cu 17 ciudad violento, mientras cu di e continente aki tin tambe 3 ciudad na Merca, y un na El Salvador, Guatemala, Puerto Rico y Jamaica.
E informe ta señala tambe e reduccion di violencia na Honduras, unda algun aña atras tanto Tegucigalpa como San Pedro Sula tabata halto riba e lista aki. Na 2016 San Pedro Sula a registra un tasa di 112,09 homicidio pero na 2017 a baha te na 51,18, un reduccion di 54% den un solo aña. E capital Hondureño ta aparece na posicion 35 riba e lista actual.
Di Colombia ta aparece tres ciudad riba e lista. Esun mas halto ta Cali (nr. 28) cu un promedio di 49,59 homicidio, y tambe Palmira (37) y Cucuta na posicion 50, cu un tasa di 34,7 homicidio.
