Departamento di Intergracion Maneho y Admision di Stranheronan (Dimas) a informa ultimamente cu e departamento ainda ta procesando mas o menos 180 aplicacion den cuadro di proyecto Dreamers. Alabes un persona cu a aplica pa un permiso Dreamers cu kier permanece anonimo a conta Bon Dia cu su aplicacion a wordo rechasa.

Kathy Paskel-Ruiz, directora di Dimas a duna di conoce cu te siman pasa e departamento a conta cu a cumpli cu 583 permisonan otorga den cuadro di proyecto Dreamers. Esaki manera anteriormente a wordo declara ta forma parti di 888 aplicacionnan cu a wordo haci durante e 2 lunanan cu e proyecto tabata vigente. Tambe mas o menos 180 aplicacion ta den proceso actualmente. Pues esaki kiermen cu e restante di mas o menos 120 aplicacion a wordo rechasa.

Pa esnan cu no a yega na remarke pa un firma liber den cuadro di proyecto Dreamers, sra. Paskel a splica cu a wordo palabra entre e departamento y e ministerio encarga cu lo invita esnan cu no a ‘fit e scope di e proyecto pa guia nan den un trayectorio regular’. Sra. Paskel no por a confirma si e consultacionnan aki a tuma luga te ainda, pero esey lo tabata e intencion na comienso di e proyecto.

Importancia di apela

Sra. Paskel a conseha pa esnan cu haya un decision negativo of rechaso y no ta di acuerdo cu esaki, entrega un apelacion na tempo. E periodo cu ley ta stipula via e LAR ta duna 6 siman pa vocifera un keho oficial ora ta trata di casonan individual pa bay en contra un decision final di un instancia gubernamental.

E apelacionnan cu a wordo haci den cuadro di proyecto Dreamers ainda ta wordo procesa, mirando cu tin persona cu ta kere cu nan ta bin na remarke pa un firma liber toch.

Variacion di persona cu a aplica

“Rekisitonan, pa repasa, di e proyecto ta cu e persona mester tin por lo menos 120 luna na Aruba. Esaki no mester ta cu permiso. Bo mester por comproba pa medio di declaracion di scol of dokter cu bo tabatin 120 luna na Aruba. Di e 120 lunanan aki bo lo mester a tin 5 aña como menor di edad. Esaki kiermen cu bo lo mester a drenta Aruba cu por lo menos 13 aña pa bin na remarke”.

Pues tabatin 2 categoria di personanan cu a aplica en general, esnan cu ta bou 18 aña, cual segun sra. Paskel tin biaha a nace na Aruba mes y esnan riba 18 aña. E grupo mas grandi tabata consisti di personanan entre 18 cu 33 aña, pero te hasta e departamento a haya 2 persona riba edad di 60 aña.

“Nos a haya te hasta personanan cu nunca a haya un number serca nos. Pues e permiso Dreamers lo a bira nan prome permiso. Asina bo ta wak cu un gran variedad di persona a aplica”.

Trayectoria di permiso persona anonimo

Un di e personanan cu a aplica pa un permiso den cuadro di proyecto Dreamers ta S.A. Un persona cu a pidi pa permanece anonimo pa conta su storia di experiencianan durante añanan cu Dimas.

Desde 1995 S.A. ta biba na Aruba. El a yega cu 14 aña y actualmente e tin 36 aña.

E persona anonimo a cuminsa scol dibiaha ora el a yega Aruba y a haya su prome permiso den aña 1998, mientras e tabata bay Mavo. Djey el a gradua di EPI den 2002, pa despues cuminsa traha.

“Tur cos a bay bon pa un tempo, mi tabatin permiso di trabou. Na aña 2011 mi a sali pa bay biba mi pais bek. Tambe mi a schrijf uit for di Censo. Despues di dos aña na 2013 mi a bin bek y mi a haci un aplicacion nobo”.

E persona anonimo a conta nos cu e mester a cuminsa di nobo cu su permisonan pasobra tabatin un regla cu ta dicta cu si tin un buraco di 1 aña of mas un persona mester cuminsa di nobo.

Pues ora e persona anonimo a haci su aplicacion el a keda warda riba Dimas.

“Mi a keda yama nan pero nan a bisa mi pa warda un luna. Mi a yama despues y den februari 2014 nan a bisa mi cu e lo ta cla y no tin problema”.

E persona anonimo ta haya su permisonan a base di tin un yiu cu ta Rubiano. E yiu ta para garante pa S.A., pasobra ta trata di su prome voogd. Despues cu e tabata warda pa Dimas su contesta, S.A. a splica cu Dimas a yama e tata di e yiu pa puntra si durante su estadia den exterior S.A. a contribui cu alimentacion pa su yiu.

Ta parce cu Dimas tabata haci nan investigacion necesario pa por otorga e permiso. Pero segun S.A. e proceso a tarda masha hopi, cual a causa cu un buraco extra a wordo crea den su estadia. Esaki a resulta den un buraco entre añanan 2011 cu 2015. “Den e 2 añanan cu mi a keda den proceso mi no tabata por a schrijf in ni tin AZV”.

Dreamers

Despues di e trayectoria aki a yega e proyecto Dreamers. Aunke originalmente e departamento a informa e persona anonimo cu e no lo cay na remarke pa un permiso Dreamers, S.A. a splica cu despues el a haya un yamada di Dimas pa entrega un aplicacion toch.

“Mi no tabata sigur pa prome, pues mi a puntra e señora si e ta 100% sigur si mi ta bin na remarke pa e proyecto. E señora a bisa mi cu e ta sigur pasobra el a check cu su supervisor. E ora ey mi a core busca 2040 florin pa mi por cubri e aplicacion”.

E persona anonimo a check cu Dimas despues di un tempo y nan a confirma cu e permiso lo sali pronto. Sinembargo despues e persona a wordo informa cu un carta ta warda p’e na post. Esaki e persona a haya straño pasobra segun el a compronde e permisonan Dreamers ta wordo duna na Dimas mes. Pues el a informa Dimas di esaki y nan a bay busca e carta na post bek. Enbes di a wordo otorga un permiso e persona a haya un carta di rechaso.

“M’a hera explode riba nan pero mi a keda trankil. Mi a purba splica e persona na e balie henter e storia y mi frustracion cu haya otro buraco. Despues di 1 siman mi mester a busca 640 florin atrobe pa haci mi peticion a base di gezinshereniging pa percura cu mi buraco no bira di mas grandi”.

Dimas a nenga e persona a base di e dos añanan cu el a permanece den exterior. Sinembargo cu den e comunicacion di e proyecto e departamento no a specifica cu lo mester tin 10 aña bibando na Aruba sin interupcion. Alabes sra. Paskel a clarifica cu e personanan cu aplica mester a keda na Aruba y no bay afo pa biba. Loke tin cu cuestiona e ora ey ta si un persona tin 20 aña ta biba riba Aruba y el a sali den e ultimo 10 aña pa un periodo di 2 aña, esaki ta algo pa hustifica di nenga un peticion pa tin permiso di periodo indefini?

Loke tambe por hunga un rol den cierto casonan ta leynan cu a cambia den pasado. Por ehempel na Aruba prome cu 2002 tabata conta cu un persona ta menor di edad te cu su 21 aña. Den e casonan aki sra. Paskel a clarifica cu e departamento mester tene cuenta cu esey si lo por nifica un diferencia pa cierto casonan.

En todo caso e persona anonimo ta canando su caminda pa por apela su caso na LAR. Esaki sra. Paskel tambe ta curasha, pa ciudadanonan ta mas prudente cu ta posibel den procesonan cu por afecta nan legalidad y specialmente si e persona tin interes pa obtene nacionalidad Hulandes.

Nomber y fam di e persona anonimo ta conoci pa nos redaccion.