‘Falta di aceptacion of comprension ta stroba desaroyo di mucha cu limitacion’

Scol Dununman:

E sentimentonan bou mayornan cu tin mucha cu limitacion tin biaha ta hopi dobel. Mayornan por ehempel ta hay’e basta dificil cu e parti di aceptacion di nan yiu cu limitacion. Un preparacion mas trempan por ehempel cuminsando for di Wit Gele Kruis ta algo cu por cuminsa yuda hopi riba e parti aki, segun cabesante di scol Dununman, Sharlin Geerman.

Pa motibo di no acepta of compronde nan yiu manera cu e ta y kico kiermen ta un mucha cu un limitacion intelectual, ta haci e proceso pa yuda e mucha un poco mas dificil segun sra. Geerman.

“Ta hopi dificil pa por midi cerca cada hende cual ta hunga e rol mas grandi. Pero cual sea e rol of motibo ta, sea aceptacion of comprension, e por stroba den e desaroyo di e alumno.” Esaki por stroba den nan manera di traha cu e alumno tambe of stroba den e situacion na cas, pues cu e mayor y alumno mes. Tin casonan por ehempel unda na scol e ta bay super bon cu e mucha pero e problema ta na cas. “Esey ta hunga un rol hopi grandi. Y no por culpa e mayornan pasobra tin biaha nan mes tin un limitacion. Anto e ora mester splica un persona cu limitacion con pa trata cu un otro persona cu limitacion, esey ta bira hopi dificil.”

Cerca scol Dununman nan a ripara tin cuater categoria di mayor: esun cu no ta acepta, esun cu no ta compronde y kisas acepta, esun cu mes tin un limitacion y esun cu ta compronde/acepta y ta haci uzo di guia pa e desaroyo di e mucha bay mas miho. E muchanan na Dununman ta muchanan cu ta cana cu un retraso di dos aña of mas. E scol ta haya cu si nan haya un guia di mas trempan, ta cosnan cu por cuminsa yuda por ehempel cuminsando na Wit Gele Kruis. Bon Dia lo sigui riba e tema aki cu Wit Gele Kruis pa mira con posibel algo asina lo por ta.

Plan anual
E scol ta traha tur aña cu un plan anual cual ta basa riba seis punto; e organisacion di scol, cuido di alumno, curriculum, clima pedagogico didactico, planificacion di personal y infrastructura. Riba eseynan tur aña nan ta planifica kico lo haci riba cada tereno. Mey mey di aña nan ta evalua kico a logra y kico no. Pa e aña aki nan ta hopi contento cu a caba di yena e vacatura di cuido di alumno pasobra nan tabata tin mester di un maestro di guia. Nan a haya aprobacion di minister cu e aña aki entrante januari lo tin un hende pa guia e muchanan riba tereno individual, of den gruponan chikito.

E structura di cuido di alumno awo na scol Dununman ta completo por medio di esaki. Banda di dje, nan a haya un aprobacion pa busca un ortopedagogo pa e scol kende lo cuminsa traha 1 di april venidero. “Nos ta hopi contento pa loke ta cuido di alumno cu loke nos a planea nos a logra te awo. Y awor ta cuestion di cuminsa traha mas structura riba e parti aki”, segun e cabesante. E ortopedagogo lo yuda hopi pa tin un persona mas cerca di e muchanan pa yuda cu e comportacion y guia di alumno en general.

Scol Dununman ta traha hunto cu Multi Disciplinaire Centrum (MDC) cu ta duna nan sosten pa muchanan cu nan ta ripara durante aña cu ta bayendo hopi bon. E scol ta haya cooperacion bastante lihe awo pa nan bin wak e mucha y wak si e por haya luga pa e bay. Fuera di MDC, nan ta traha for di nan fundacion cu trahado social y psicologonan ta canando hopi bon segun e scol.

Infrastructura
Pa locual ta e parti di infrastructura, pa yega na un mantencion grandi pa e scol, nan tin un plan caba pa algun aña cual ta mas den man di gobierno. E scol a traha un relato door di un architecto cu a evalua e scol y wak kico mester drecha. A pone tur cos den un plan hunto cu presupuesto anto esey a wordo manda na 2016 pa gobierno y nan ta wardando pa wak ki dia nan ta bin na beurt. “Loke si nos mes ta haci como scol, como colega y team di scol, den e parti aki nos ta haci hopi y ta hopi dinamico. Nos no ta warda ki dia gobierno ta haci algo pero nos mes ta busca fondo y pone man na obra. Y sigur haci uzo di oportunidadnan manera Aruba Doet.”

Bus nobo
Locual e scol tabata tin pa e aña aki ta necesidad di un bus nobo pa e scol. Nan tin un bus cu nan ta uza pa transporta e muchanan pa gym pasobra e gym ta otro banda di caminda. Nan mester un bus pa hiba y trece e muchanan bek. Nan tin un vak caminda e topiconan cu nan ta trata den klas, nan ta bay pafo di comunidad tambe pa nan wak nan. Por ehempel si ta trata fruta y berdura, nan ta bay un supermercado pa nan wak nan y haci e les biba mas segun e realidad. Y p’esey nan ta haci uzo di un van cu por carga 15 persona mas o menos pero e ta den hopi mal condicion. Geerman: “Cu e dinamismo y entusiasmo di e team, nos a organisa diferente actividad pa haya fondo y na januari nos a haya e bon noticia cu Stinafo di Hulanda (Stichting Nationaal Fonds Het Gehandicapte Kind) ta yuda cubri un parti hopi grandi di e bus.”