Autonomia financiero di pais Aruba, lo wordo entrega na Hulanda pa haya placa fia y tur cos ta indica cu esey ta e rumbo cu gabinete Wever Croes ta bayendo pa atende cu presupuesto 2018 pa falta di conocemento y capacidad pa goberna. Parlamentario di fraccion di AVP, Arthur Dowers a mustra cu for di e dianan inicial di e gobierno di coalicion, tanto prome minister Wever Croes como minister di Financia Ruiz-Maduro, a papia cu nan lo no por cumpli cu normanan pa presupuesto 2018 y cu nan lo bay Hulanda pa trata di haya ayudo pa logra un prestamo cu interes limita.
“Ta mesun politiconan aki den pasado como miembronan di oposicion, a biaha pa Hulanda cu rapport cu nan mes a traha di cual uno a carga e titulo ey feestvierend ten onder gaan, pa trata di haya sosten di politiconan Hulandes, pa tuma paso contra gabinete Mike EmanII. Na Aruba nan a papia cu gobierno di AVP lo a entrega autonomia financiero na Hulanda, ora cu a pasa e ley temporal pa CAFT por funciona den un periodo stipula.
Awor ta bisto cu pa falta di conocemento, pa falta di capacidad, y pa falta di nocion di con pa goberna e pais, ta practicamente acepta tur loke CAFT pone como conseho, cual medidanan tin cu wordo introduci riba lomba di pueblo.
Ocho aña largo pueblo wordo libra di medida, a wordo alivia di BBO y gabinete Mike Eman I y II a percura pa atende mas tanto cu tabata por, cu esunnan di menos entrada. Awe gabinete Wever Croes ta a punto di introduci aumento di BBO, aumento di BAZV, aumento di grondbelasting, aumento di invoerrechten, aumento di loonbelasting, cu lo pone presion riba tur cas di famia aki na Aruba ya cu gobierno di coalicion no por atende cu e situacion cu tin actualmente.
Un biaha mas por a scucha for di e dos mandatarionan aki e expresion cu nan lo bula bay Hulanda, pa busca ayudo y sosten financiero cual no a sosode pa ocho aña largo. Ni un cen preto gobiernonan di AVP a pidi na Hulanda pero awor tur cos ta mustra cu esaki lo bay ta e caso, caminda e ayudo di Hulanda aki pa busca placa presta cu un interes minimo, lo bay a costo di autonomia financiero di nos isla. Den pasado gobierno Hulandes a yega di pone como condicion, un CFT permanente aki na Aruba, cu lo determina practicamente tur decision financiero di gobierno, kitando e autonomia completo cu tanto pueblo di Aruba a lucha pa haya. Sinembargo ora cu politiconan cu den oposicion nunca a cumpli cu nan obligacionnan pa cu pueblo y simplemente a hunga politica cu tratamento di presupuesto den e periodo aki, awor ta para dilanti di un situacion cu nan no ta sa kico pa haci”, parlamentario Dowers ta mustra.
El a sigui mustra cu tambe por a scucha recientemente declaracionnan di entre otro prome minister contra di sindicato y gremionan, bisando cu pa ocho aña largo nan no a habri nan boca, pues keda keto awor, confirmando cu su gobierno no ta kere ni sostene dialogo habri cu gremio y instancianan den comunidad
