Oficina di Scarlet
Oficina di Scarlet

Segun e fuente Amigoe Aruba, abogado Arnold Huizing a solicita na corte pa retira e posponemento di pago cu a wordo otorga na e compania di internet Scarlet. Segun sr. Huizing, e ta mustra scur pa e compania. E unico cos cu lo por salba e compania ta un inversion di minimo 10 miyon Florin. E abogado no ta wak cu lo por yega na e suma aki.

Segun e informe di e abogado (2 augustus), ‘un futuro unda Scarlet lo por complace e debenan cu a wordo acumula no ta existi.’ Esaki a wordo expresa despues cu e director di Scarlet a declara cu e compania lo por bin na remarke pa un financiamento, pero prueba cu esaki lo ta posibel no ta existi segun sr. Huizing.

E personal di Scarlet tin 2 aña ta scucha e mesun storia”. Segun e reporte di sr. Huizing, Scarlet a nenga di contesta varios peticion pa paga nan debenan. E compania a pidi pa pospone e pagonan despues cu a wordo pidi na nan pa declara bancarota. E peticion aki a wordo acepta pa corte di Corsou. E compania tin total un debe rond di 8.4 miyon.

Porta cera pa cliente

Algun siman atras Bon Dia Aruba a logra haya comentario di un ex-empleado di Scarlet unda cu e empleado a expresa cu tin basta tempo ta wardando pa directiva di Scarlet drecha nan problemanan. E empleado a splica cu e doñonan no ta na Aruba ni Corsou, unda cu e operacionnan di e compania ta basa. Despues di esaki nos por nota cu e oficina di e compania no a habri bek.