Vivianne Miedema a anota 2 gol diadomingo pa yuda Hulanda derota Dinamarca 4-2 y asina conkista nan prome titulo di Campeon Europeo Femenino, cual naturalmente tabata e inicio di un celebracion entre e miles di fanaticonan Hulandes.
E coach Hulandes Sarina Wiegman a bisa cu e ta spera cu e victoria y e exito durante e torneo cu a tuma luga na Hulanda, lo promove futbol entre mucha muhenan Hulandes y proba cu e victoria por ta un
plataforma riba cual por construi exito mas grandi pa e ekipo femenino, awo cu nan ta prepara pa cuminsa cu cualificacion pa Copa Mundial mas laat den aña.
E final tabata un desapuntacion pa Dinamarca, kendenan a saca e 6 biaha campeon Alemania den kwart final, y logra nan prome final despues di a perde 5 semifinal sigui. Dinamarca a gana Austria pa tiro
di pinalti den semifinal, pero den final nan tabata mustra cansa den di 2 mita, cual a permiti Hulanda controla e wega.
E wega a cuminsa bon pa e Danesnan, ora cu Nadia Nadim, un refugiado di Afghanistan kende su tata a wordo mata pa Taliban, a converti un tiro penal na di 6 minuut di wega. Despues cu Kika van Es a benta Sanne Troelsgaard den area penal.
Fanaticonan Hulandes no mester a warda hopi pa mira nan ekipo empata y wega. Na di 10 minuut Miedema a empata e wega hincando un bala crusa di Shanice van de Sanden.
Na di 28 minuut Hulanda a bay ariba 2-1 cu gol di Martens. Despues na di 33 minuut Harder di Dinamarca a empata e wega bek.
Trempan den di 2 mita Hulanda a anota, e biaha aki tabata Spitse na di 51 minuut y despues na di 89 minuut Miedema a seya e victoria y e titulo pa Hulanda. Esaki ta e prome biaha cu e ekipo femenino Hulandes ta gana e Copa Europeo.
Lieke Martens di Hulanda a gana e premio pa Hungado di Torneo.
