Luna di december a drenta y hunto cu ne, comision di Vuurwerk a tene su prome conferencia di prensa na post di Brandweer na Tanki Flip. Nan a bini cu advertencianan y recomendacionnan riba e periodo di benta di klapchi cu ta cuminsa dia 27 di december awor, y ta clausura oficialmente dia 1 di januari 2018.

E prome contratiempo cu nan ta confronta ta cu e containernan di  klapchinan no a yega ainda segun e fecha oficialmente stipula. Experto riba explosivo di DOW, Rubin Ponson kende pa añanan ta forma parti di e comision aki, a laga sa cu e importacion di vuurwerk a cay laat.  Den principio tin un cantidad di 19 container cu ta na caminda kiermen nan no a yega ainda. Segun e maneho di klapchi  nan mester yega prome cu december.

Fecha tentativo
Aworaki segun sr. Ponson nan fecha tentativo pa e container yega Aruba ta alrededor di memey di december . Sinembargo ya caba nan a haci preparacionnan necesario caba pa ricibi e containernan. “Tur e departamentonan ta prepara pa cuminsa haci e trabou pa baha e containernan aki.”

Na momento cu e containernan yega carga cu e klapchinan cu lo wordo bendi durante e dianan di cambio di aña, tambe nan tin reglanan pa cumpli cu ne. E prome ta esun di baha y transporta e containernan aki di un forma safe. Esaki ta haci cu kisas mas laat e container yega, ta bay bira dificil pa tur e containernan aki por wordo habri prome cu e dia di benta.

Sinembargo esaki no ta afecta e dia cu oficialmente e bendedonan di klapchi por cuminsa bende nan cu ta dia 27 di december awor. E mesun dia aki nan ta saca e container for di deposito di Wela. E unico cos ta cu kisas  nan ta bay keda ainda containernan cu mester wordo habri riba e dia aki. Pero esaki ta depende di e ora cu nan ta yega, segun sr. Ponson.

Pa loke ta e reglanan cu ta regarda e benta di klapchi nada a cambia. E reglanan a keda mescos cu aña anterior. Sinembargo e comision di vuurwerk tin un proposicion manda for di cuminsamento di aña, y nan ta spera cu pa e aña cu ta bini esaki lo wordo aproba na tempo. E proposicion aki ta contene cambionan riba e reglanan specialmente pa e bendemento di klapchi.

Recomendacion
Tin un total di 4 container di klapchi cu a resta di aña pasa. Sr. Ponson a laga sa cu semper ta sobra klapchi bieu. Manera custumber por warda e klapchi te cu 1 aña so. E ta recomenda cu esunnan cu ta bay cumpra klapchi mester wak cu e aña ariba e producto ta for di 2016. E biaha aki 2016 y 2017 ta e klapchinan cu por wordo bende ainda.

Na tur esunnan cu ta bay cumpra klapchi e ta sugeri pa corda bon cu fin di aña ta bira dianan cu ta bay ta un poco druk, y tur hende ta pura. “Corda keda responsabel na momento di cumpramento di klapchi.”

Tambe ora cu bo ta cumpra klapchi wak bon cu sortonan bo ta cumpra y compronde kico e klapchi aki ta haci prome cu bo ta cumpra nan. Den caso cu bo no ta compronde of bo no sa kico e klapchi ta haci, semper puntra esun cu ta bende e producto y e mester por splica bo con bo por uza e klapchi aki.