NOORD- E Olimpiada Escolar Betico Croes 2009 a cuminza ayeratardi den Compleho Deportivo Frans Figaroa na Noord. Un gran cantidad di persona a acudi pa mira e apertura cu sigur tabata un spectaculo masha bunita mes. E cantidad di mucha tambe a surpasa tur spectativa y nos mester bisa cu e parti tecnico a  hala bon atencion di tur esnan presente.
E olimpiada ta ser dedica na Sra. Sandra Croes, Sra. Ola Figaroa, Sr. Richard Rodriguez y Sr. Betto Maduro.
Tabata un apertura masha colorido caminda e atleta Annelaine Jacobs a carga e antorcha cu a ser usa pa cende e candela Olimpico cu lo permanece cendi pa dos siman largo. Nos di Bon Dia Deporte ta desea tur e atletanan tur clase di exito den e dos simannan aki.
Un pabien di curazon na Ministro Lee kende un biaha mas ta ofrece e hubentud notro oportunidad pa briya y sobresali! Pabien!

COBA LODO- Despues cu dia 17 di mei ultimo tabata tin e promer careda for di un pointseries di tres, Comision di Ciclismo pa Hubentud di AWB ta sigi cu su programma di ciclismo di ruta pa 2009 cu e di dos careda di circuito cu lo tuma lugar e biaha aki na Coba Lodo na Santa Cruz.
Inscripcion y control di bicicleta  ta cuminsa  pa 7:00 am y caredanan lo start pa 7:30 am y lo tuma lugar diadomingo riba dia di careda y ta costa Afl 5,- pa participante.
Ta pidi tur coredor cu a participa na e promer careda di pointseries pa bin cu nan number