ORANJESTAD—Pa Minister di Asuntonan Economico, e ‘shutdown’ di Valero, of por lo menos su continuacion no ta un sorpresa. E condicionnan pa cua a tuma e decision algun tempo atras no a cambia. E motibo ta cu e margen di produccion a baha. ‘Ora cu nan no haya e descuento riba e petroleo cu nan ta procesa pa nan haci ganashi cu ne, e pensamento logico ta cu ta shut down pa warda situacion drecha,” Minister Nilo Swaen a bisa.
Riba e pregunta ki consequencia e decision aki pa sigui cu e ‘shut down’ pa un tempo indefini tin pa caha di Gobierno, Minister Swaen a bisa cu te ainda Valero ta pagando, pues ainda no tin consequencia.

 

 “Di un banda mi ta compronde Valero. Si bo margen no ta mustra bon, bo no ta ‘haal e’ di e facil ey.”
Nilo Swaen ta reconoce cu e ‘shut down’ lo tin su efecto pa henter economia. Valero den su totalidad ta contribui cu 12,5 porshento na e Producto Domestico Bruto, cu ta 500 miyon florin pa aña. E ta kere cu mester warda pa haya tur informacion prome cu calcula ki efecto e shut down lo tin realmente, ya cu e trahadonan lo no sali afo cu man bashi. “Ta depende ki tipo di areglo lo sali afo cu n’e.” 

 

ORANJESTAD – E problemanan rond di The Aruban Resort ta parse di no tin fin. Ayera un biaha mas trahadonan a dicidi di pone trabou abou, debi na e hecho cu Gerencia a participa na e trahadonan cu no tin sen of cu e sen no a yega ainda pa paga nan conforme e acuerdo cu tin riba mesa. Esaki a pone cu e trahadonan den tur e sectornan di e resort a dicidi di pone trabou abou un rato, pa expresa nan disgusto pa cu e situacion cu ta tumando luga.