SAN NICOLAS—Diasabra pa banda di 4.10 di madruga, polisnan ta ser dirigi pa Pastoor Hendrikstraat, na altura di Maxi’s pa un accidente di auto cu herido. Na e sitio polisnan ta bin tuma nota di un accidente di trafico caminda probablemente no a duna preferencia, y tambe velocidad halto y supuesto uso di mas di alcohol, a hunga un rol grandi. Polis a constata cu e Susuki preto A-29551, no a duna preferencia na e Toyota Starlet A-49761, cu tabata wordo maneha pa e hoben A.A.R. naci na Aruba di 19 aña.
CATIRI- Diadomingo mainta riba e caminda di Catiri, un auto maneha pa un dama bayendo den direccion noord, pa un motibo of otro ta perde contol y ta swing bai riba su man robes y dal den un pickup cu tabta biniendo for di direccion copntrario. E impacto tabata frontal y e dama chofer a keda herida y transporta pa hospital. Polisnan no a determina ainda kico a pasa cu e chofer cu el a perde control y bai otro banda di caminda.
SANTA CRUZ- For di Estrella Taekwondo, organizadornan di e campeonato di taekwondo en coneccion cu e ASU Olimpiada nos a haya e siguiente resultadonan di e campeonato. E campeonato a tuma lugar na Club Estrella diasabra ultimo cuminzando den oranan lat di atardi y terminando den e prome oranan di anochi. Nos por bisa cu un publico bastante grandi a acudi pa apoya e hobennan cu ta practicando nan deporte faborito. Nos a mira varios bon prospecto y nos ta spera cu e hobennan sigui cu e mesun entusiasmo cu nos a mira nan diasabra anochi.
ARASHI- Diadomingo 22 di november a tuma lugar un competencia extreme di mountain bike den pareha cu a cuminsa pa 7’or mainta na Arashi. Un evenemento cu pa prome biaha a wordo organiza asina intenso y extremo cu a tuma varios luna di preparacion caminda coredornan di mountain bike mester a bataya den pareha riba un ruta di 60km hopi duro y tecnico pa asina por a cay den premio. E evenemento a resulta di ta un exito rotundo caminda cu 69 coredor a start, solamente 9 persona a keda sin termina y 4 persona a keda descualifica.
