NOORD- E organisacion di SV Britannia di Piedra Plat, un bez mas a score, pero e biaha aki tabata e damitanan, kendenan a demostra claramente cu a nan tambe por hunga bon futbol. Den tur tres Division di futbol femenino, e organisacion di SV Britannia a sa na clasifica pa e gran final. Mester bisa cu bou asistencia di un publico inmenso na stadion di Frans Figaroa na Noord e weganan final a tuma lugar. Den e prome categoria, esta infantil, e damitanan mas chikito di SV Britannia a empata cu e equipo di SV The Rose cu e score di 1 – 1, cu golnan anota pa Andreina Morillo pa Britannia y Gilia Croes pa The Rose. E equipo di Britannia a titula campeon cu e empate aki.

WAYACA- Diadomingo atardi a yega Aruba e mascota Oficial di Mundial di FIFA 2010, esta Zakumi. Za kiermen Sur Africa y Kumi ta significa 10, pues Sur Africa 2010. Zakumi ta masha alegre, cariñoso y ta gusta sera amistad. Despues di un viahe largo for di Sur Africa, Zakumi a yega Aruba pa asina por sera conoci cu e muchanan di Aruba. E ta masha contento di por ta na Aruba y lo ta presente durante e fin di siman aki na e Feria Royal organiza pa Britannia Lifida pa asina e muchanan por sera conoci cune y tambe saca potret si ta desea esaki. E Feria lo tuma lugar diahuebs 29, diabierna 30 di april y diasabra 1di mei na Centro di Bario Piedra Plat. Comision di Mayor di Britannia Lifida ta organiza e Feria aki pa asina recauda fondo pa por sigui cumpra material pa e muchanan por practica futbol pero tambe pa e organiza actividadnan social pa e muchanan.

Aruba Meets Europe a inicia y mester bisa cu e grupo di partnernan di turismo for di Europa presente aki na nos isla ta uno gradi y hopi entusiasma.
Dialuna anochi tabatin e cocktail di bon bini na Museo Arqueologico, caminda cu nos partnernan di nos industria principal a conoce un poco mas di nos cultura, algo cu ta cuadra den maneho di Minister di Turismo Otmar Oduber.
E anochi aki nos bishitantenan a haya un recorido den e museo cual sin duda algun tabata un experiencia unico mirando e detayenan duna pa personal di e museo y tambe e forma interactivo pa haya mas conocemento di nos hitoria y cultura. E decoracion y servicio di e anochi a brinda un ambiente unico caminda nos partnernan Europeo a sinti nan mes mas cerca di nos cultura y sigur cu mas animo pa bende nos producto.
Diamars mainta tabatin e sesion general caminda e participantenan di Aruba Meets Europe a haya tur e informacionnan relevante di e cambionan cu ta tumando lugar pa loke ta trata Producto Aruba en general.

ORANJESTAD – Den edicion di ayera Bon Dia Aruba a publica un parti di un raport devastador cu a wordo concipia recientemente door di Arubaanse Vereniging van Belastingconsulenten (AVvB) y cu tin di haber exclusivamente cu e trabou cu ta wordo realisa door di Servicio di Impuesto di Aruba cu sigur no ta yega ni cerca di un voldoende si nan mester haya un puntuacion. Y tristo ta cu pa erornan di e Departamento aki Aruba ta wordo perhudica.
E cantidad di reaccionnan cu Bon Dia Aruba a haya ayera despues di e publicacion aki ta ilustra e falta di confiansa cu tin den SIA y cu ta exigi pa trece cambio unda cu nan mester bay traha mas “klant vriendelijk” pero tambe den forma mas eficiente. A wordo señala cu e hecho cu un gran parti di e funcionarionan no tin e educacion necesario ta haci cu hopi eror ta wordo cometi cu ta causa iritacion cerca e pagado di belasting y dolor di cabez, hopi biaha, inecesario.