ORANJESTAD- Prome Minister di Aruba mr.Mike Eman a habri e reunion di Parlamento diasabra mainta gradiciendo miembronan di Parlamento pa a bin hunto riba un diasabra y den un periodo asina cortico pa trata e leynan den e settlement agreement cu gobierno a firma cu Valero na luna di februari. Mester remarca cu e interes pa e reunion aki tabata enorme. Un tribuna yen di hende for di mainta tempran te cu 2.30 di marduga ora cu e reunion a caba.

Hopi di esnan presente ta empleadonan di Valero cu a sigui e reunion cu masha atencion.
Prome Minister Eman a splica un bes mas e importancia grandi di e tres leynan aki cu ta encera cambionan di e regimen fiscal pa Valero y cu na mes momento ta habri avenidanan di oportunidad pa un posibel reapertura di e refineria. Eman ta splica cu e leynan aki ta importante pa diferente motibo. Nan ta sigura un miho posicion pa e 3 mil empleadonan di Valero cu ya a perde trabou y pa e riba 600 hende cu ainda ta den e refineria. Kitando e ley di BBO riba exportacion cu tabata un di e motibonan principal di ciere di Valero bou di e gobierno anterior, ta kita un peso grandi di e refineria.

SERO PATRISHI- Diadomingo mainta bisiñanan di e cas na Sero Patrishi 27-D, a bin  tuma nota cu desconocirnan  a kibra un porta  di palo di un di e apartamentonan pa drenta den e lugar, probablemente pa horta. Sinembargo ora cu polis a yega  na e sitio y a hala e porta pa drenta paden, nan a keda sorprende ora cu nan a bin haya  un laboratrio super sofistica pa e cultivo di marihuana. Entre otro a bin haya lusnan caro, y tambe un  sitema di ventilacion hopi special caro, botter di CO2 cu ta pa balansa e aire den e camber.

CAMACURI- Diadomingo atardi durante e actividad di Camacuri Ride,  a sosode un accidente serio y ora cu na dado  momento, un scooter a cruza dilanti di un Harley Davidson y den e choke aki, e Harley grandi ta bin cay riba un señora kende tabata riba e scooter. E accidente a sosode asina rapido y sorpresivo c’un otro Harley Davidson net tras di esakinan cu tambe tabata den e parada, no por a maniobra y kita liher  y e tambe a pasa riba pia di e señora. Esaki a bin ocasiona un fractura  na su  pia robez y  el a wordo transporta cu ambulans pa hospital.

ORANJESTAD- Pa banda di 5.20 di atardi e prome aviso a tuma lugar ora cu di repente tur aparato electronico a switch of y on den un lapso di un te dos seconde.
Tabata voorboor di loke tabata na caminda y mientras cu  e prome “shock” aki no a percura pa inconvenencia, tabata manera un aviso di temblor chikito, sperando riba esun grandi na caminda.
Alrededor di 20 minuut a pasa bai ora cu suministro total di coriente a cai afor  lagando Aruba den un black out total.
E daña cometi tabata inmenso, caminda cantidad di actividad a keda cancela miles y miles di florin a wordo perdi. Un di e eventonan grandi tabata e cancelacion di e prome anochi di Soul Beach Music Festival, cu no por a continua pa falta di coriente.
E panico a drenta mesora y e rumornan sin base a lanta cabez caminda entre otro a pasa informe cu lo tabatin un explosion den WEB Aruba NV y cu esaki lo bai afecta e suministro di awa tambe  den oranan di anochi.