ORANJESTAD – Aruba lo haya su propio parke maritimo, confirma pa Minister di Turismo Otmar Oduber. Esaki a keda participa ayera den un forma no oficial door di e organisado di e Aruba Reef Care Project 2010, Castro Perez. E la bin tende di esaki ora cu a bay entrega Minister Otmar Oduber e prome t-shirt y mas informacion riba e proyecto di conscientisacion di limpiesa di lama.
Tabata durante e entrega aki cu Oduber a participa na Castro cu e Aruba Marine Park ta den un fase bastante avansa. “Y esey nos ta hopi contento cune” Perez a bisa. E la recorda cu ta pa masha aña ta bogando pa un parke asina pero cu nada tabata concreto. Segun Perez, no tin nada mas satisfecho despues di a campaña na varios gobierno cu porfin awor ta parce cu e parke su plannan ta hopi avansa.

ORANJESTAD – Despues di un trankilidad basta largo pa loke ta casonan grave di arma di candela, ayera nochi ta sosode un caso bek. Y e tragedia a bolbe bati na porta di famia Gomez di Jan Flemming, caminda e victima a resulta Francis Gomez. E hoben kende su pia di morocho a haya un tiro mortal den un problema cu Polis mas o menos dos aña pasa.
Tabata despues di 8’or di anochi cu Polis ta wordo informa di un herido cu bala cu a wordo treci Poli na dr. Horacio Oduber Hospital.

Tur autoridad concerni a wordo manda na Poli pa busca informacion, y na mesun momento a drenta informacion cu e victima a fayece.

E victima, segun informacion compila, a wordo treci den un BMW cora, y autoridadnan a constata cu den e auto parti patras, tabatin masha sanger. For di e dokternan na hospital, nan a wordo informa cu na yegada di e victima Francis Gomez, a bay cune mesora pa camber di operacion. Pero no por a haci nada pe y mester a constata cu el a fayece.

ORANJESTAD – Ayera nochi a tuma lugar eleccion di Miss Teen Aruba, cu porcierto a caba basta laat, despues di mey anochi. E maximo ganadora di e anochi aki a resulta candidata no. 1 Lynette do Nascimento. E prome finalista tabata Idimara Yanes y 2do finalista tabata Laura Ruiz. Pabien na tur e damitanan.

ORANJESTAD - E siman aki Minister di Salubridad Publico y Deporte, dr. Richard Visser tabata di bishita den East Wing na Cas Blanco di Merca. Ey e experto riba tereno di combatimento di obesidad y alabes Minister den Gabinete Mike Eman a reuni cu e conseheronan principal di e primera dama di Merca, Sra. Michelle Obama. Manera ta conoci, un di e proyectonan cu e primera dama Mericano tin halto riba su lista di prioridad ta combatimento di obesidad y cu enfasis riba e generacion nobo.

Pa esaki a manda invita Dr. Richard Visser di Aruba, kende a studia y a haci hopi investigacion riba e tereno specifico aki, pa por yuda e conseheronan di Gobierno Mericano den deliña nan maneho riba e tema specifico aki. Riba e foto aki por mira e team di conseheronan personal di Sra. Michelle Obama riba Obesidad, den su oficina den East Wing di Cas Blanco. A reuni pa un ora y mei riba nan plan y nos propio Plan Nacional di Aruba 2009-2018. A keda cu lo traha hunto riba e tema aki, prevencion di obesidad bou di nos muchanan. Den edicion di mañan lo bini cu mas informacion di e reunion aki.