ORANJESTAD- Un alegria enorme tabata reina despues cu e muchanan di Travel Team Aruba 10U ora cu nan a titula campeon den e World Series Travel Ball di WBF. E muchanan a gana Venezuela cu a yega te final ganando Puerto Rico y Aruba a gana Panama. Hopi tabata e spectativa pa e wega aki ya cu Venezuela ta conoci pa bon baseball. E muchanan di Aruba a bataya fuerte y a logra gana tambe pa bay cu e titulo di campeon. Den e prome inning caba Aruba a bay dilanti cu dos careda ora cu Lyonell Briesen a subi base cu deadball, Jerrick a sigui cu infield hit, Kaber Rog a enbasa na primera pero riba e hugada Lyonell a bay home y ta sali out. Despues Eric Mendez a conecta un triple, un bataso cu a bari base, y Jerrick y Kaeber a anota e prome dos caredanan. Venezuela a reacciona den e di dos inning y a conecta un par di hit solido pa tuma ventaha di 3-2.

SUR AFRICA- For di sr. Alan Howell, tata di Shanayah nos a haya e siguiente informacion relaciona cu e campeonato mundial cu ta tumando lugar na Sur Africa. E comunicado ta bisa asina ki.
Shanayah ta termina den un forma dramatico na di tres di mundo den competencia di BMX na Sur Africa. Coriendo su prome tres caredanan den gran forma saliendo den tur su rondanan di dos lugar  pa asina busca clasificacion pa pasa pa e final. Shanayah su contricante mas pisa tabat e Japones manera tabata ja spera.

Den final Shanayah ta hanja gate 8 cual ta e gate mas afo. Hanjando gate 8 y e Japones gate 1, a pone ku Shanayah mester a traha extra duro pa pasa su contricante nan. Shanayah ta sali for di e gate ku velosidad halto pasando tur su contricantenan cu excepcion di e Japones. Kedando pega su tras te casi na final den unentento pa surprise e Japones, Shanayah ta perde su pedal (es decir su klip a los) ku a pone perde velosidad y asina e Austrliana ta pasa Shanayah na Finish Line. Shanayah mester a conforma su mes ku e di tres lugar di mundo.

ORANJESTAD – Aruba hunto cu Antiyas a yega na palabracion concreto cu embahador di Hulanda na Colombia recientemente pa agilisa y suavisa e asunto di visa pa Colombianonan bishita nos isla y Antiyas mas facil. Un participacion cu a bin ayera di parti di minister di Transporte y Turismo Otmar Oduber. Tabata durante bishita recien di Oduber na Colombia, a ricibi un carta for di Antiyas (Prome Minister De Jongh) unda cu ta reafirma un acuerdo pa e uso di e visa canades, mericano y shanghai cu por wordo uza pa Aruba sin cu esaki a wordo uza un biaha caba. Esaki ta un cambio drastico segun Oduber segun e maneho. E maneho anterior tabata cu e colombiano, aunke cu e tin un visa asina, e mester a use caba prome cu e bishita Aruba.

ORANJESTAD – Ayera tardi un biaha mas personal di cuerpo di bombero a ser manda den direccion di e ruinanan di ex Bushiri Hotel. Dos unidad di bombero a presenta na e sitio pa atende cu e alarma di candela   y cual a ser controla mesora. Segun un guardia di seguridad, un auto sospechoso color cora a para patras di e edificio di e hotel y di repente un rato despues el a tuma nota di  cantidad di huma cu a cuminsa ta sali for di edificio caminda e auto tabata staciona. Fuente no oficial a informa Bon Dia Aruba cu testigonan a scucha  dos explosion  for di e hotel pero e version aki no por a ser confirma ainda autoridadnan policial. No ta e prome biaha cu e edificio aki ta na candela y e situacion aki ta demanda un solucion urgente.