ORANJESTAD—Cu un mayoria simpel di 12 pro y 9 contra, Parlamento di Aruba a acepta e cambionan di Statuut cu ta habri porta pa desmantelacion di Antias Hulandes y creacion di Paisnan Corsou y St. Maarten. Un mayoria simpel despues cu durante e prome reunion no a logra e dos tercera parti di mayoria di parlamento.
Manera tabata e caso durante tur e tres dianan di reunion, cu a inclui e prome reunion cu a conclui cu e ley no por a pasa, e ambiente tabata tumultoso, acusante y den cierto ocasion te hasta hopi infantil, te hasta di parti di Ministernan presente. Durante e reunion ayera mainta, Presidente di Parlamento drs. Paul Croes a bisa miembronan di su mesun fraccion di AVP, esnan di MEP, ademas di e Mnisternan presente cu nan comportacion tabata laga di desea, y como tal, nan tabata contribui cu publico tambe tabata inkieto.  Croes tabatin elogio pa Parlamentario Andin Bikker, kende den su concepto, a hiba un actitud debido y digno di un representante di pueblo.

ORANJESTAD-Ayera nochi recherchenan di Playa a haci dos detencion di dos turista latino na Paseo Herencia, bou di sospecho di skimming. O sea haciendo uzo di credit card falso. Esaki despues di un investigacion cu a tuma lugar. Despues di nan detencion nan a wordo trasnporta pa warda di Playa pendiente mas investigacion.

ORANJESTAD - Dia 2 di september 2010 a tuma luga e firmamento di contract pa e traspaso di fondo pa e aña 2010 na Stichting Centro pa Desaroyo Aruba (CEDE).
Pa e sector di NGO a firma e contract pa e traspaso di e fondonan di 2010 na CEDE Aruba pa un suma total di AWG 1,500,000. CEDE Aruba ta un fundacion cu ta cofinancia proyecto di organisacionnan no-gubernamental asina yama NGO- nan. CEDE Aruba ta activo riba e terenonan di: bienestar social, educacion publico y recreo publico. Na Aruba ta existi mas cu 150 organisacion particular riba e terenonan menciona, cada uno contribuyendo na su manera na e bienestar di e comunidad Arubano.
CEDE Aruba ta co-financia; esey kier men cu e peticionario tambe mester contribui na e realisacion di e proyecto.

ORANJESTAD – Ayera den oranan di merdia den forma urgente mestr a desaloha sala di reunion di Parlamento ora cu un “chistoso” a yama pa bisa cu tin un bom den Parlamento. Autoridadnan no a tume na joke y a saca tur hende pa listra y finalmente no a haya nada. E reunion a sigui algun ora despues pa wordo para ayera nochi atrobe, despues cu a surgi discusion fuerte di bishitantenan di Parlamento cu Polis. Esaki encuanto cu no ta laga hende cu sali pa drenta bek, pero si e trahadonan di Minister de Meza cu a trece documentonan pa e mandatario.
Pa evita problema, Presidente di Parlamento a schors e reunion te awe mainta