ORANJESTAD – Si diabierna no por a duna informacion riba e investigacion cu lo tin cu tuma lugar na Aruba, esaki a keda specifica diasabra mainta durante conferencia di prensa cu Secretario di Estado hulandes Ank Bijleveld. Segun Bijleveld kier haci un investigacion independiente y cientifico unda cu Eman ta bai di acuerdo cu esaki. Den e proximo simannan lo papia hunto riba esaki pa bin cu un orden conhunto cu contenido y cu lo wordo efectua pa WODC, esta Wetenschappelijk Onderzoek Centrum cu lo haci esaki. Lo kier mira resultado for di e investigacion aki unda cu lo por tin recomendacion cu mester desemboca den un maneho segun e mandatario hulandes.

A papia como tal hopi positivo y serio riba e topico aki y a haci palabracion y ta spera cu dentro di un luna lo por tin palabra kico exacto e investigacion lo tin cu enfoca ariba. Ta algo hopi comun na Hulanda cu ta tuma lugar.

A mustra cu for di banda di Hulanda tin un peticion pa un investigacion y Aruba lo haya oportunidad pa mira esaki y delibera riba esaki. Unabes cu esaki ta haci, dentro di un luna lo bin hunto pa bin na un orden comun di tanto Hulanda como Aruba riba kico exactamente lo mester wordo investiga.

Tabata diabierna den e programa Papia Cla cu Bijleveld a declara na Tito Lacle cu ta normal cu paisnan kier un garantia cu nan Gobierno y pais ta funciona manera cu mester ta. Y como tal un investigacion cu ta na caminda ta masha normal. Esaki ta pensamento di Secretario di Estado Hulandes Ank Bijleveld relaciona cu e investigacion cu mester bin proximamente contra pais Aruba. Un investigacion cu segun e mandatario hulandes, lo sosode pues conhuntamente cu Aruba su participacion.

Segun e mandatario hulandes e ta mustra cu tin asina hopi señal cu tin varios asunto cu ultimo tempo no ta canando bon na Aruba. Ora cu papia di Aruba, ta papia di e bon funcionamento di e autonomia, maneho di Gobierno y mas. E kier pa e investigacion enberdad tuma lugar, y si por, cu participacion di Gobierno di Aruba, dirigi riba conseho pa futuro pa haci cosnan mihor.

Segun Bijleveld, ta semper bon pa un investigacion asina y pa wak den spiel con bo mes ta funciona. Algo cu ta tuma lugar na Hulanda tambe den varios municipio cu e tin mandato ariba. “Wak cada 4 aña riba e poder di gobernacion y wak si e ta funciona. Tin sigur hopi cos cu ta wordo bisa y esaki ta bira e momento e ora tambe pa bo rechasa y refuta cierto acusacionnan” Bijleveld ta sigui bisa.