ORANJESTAD – Mudamento di container haven lo continua, pero tin pensamento diferente di con pa haci esaki segun minister di Transporte Otmar Oduber a splica Bon Dia Aruba. E plan di Gobierno ta pa sostene e movemento di e parti, pero e forma cu mester tuma lugar mester ta diferente cu e gobierno anterior. Algo cu nan a confirma durante e presentacion recien cu e director di Aruba Ports Authority Alfonso Boekhoudt.

Interesante ta cu a dicidi cu ta bai split e responsabilidad di trabou di waf entre ministernan Mike de Meza, y minister Otmar Oduber segun Oduber mes a splica Bon Dia Aruba. De Meza lo keda cu e responsabilidad mayor pa loke ta e parti di mudamento di Container y conhuntamente cu Oduber lo atende e parti di Crucero di APA. Aki lo formula un plan a corto plazo pa cu esaki.

A dicidi cu lo hiba e maneho for di un distancia pa duna APA e oportunidad pa funciona y montiroia esaki den conseho di Minister.

Tabata algun siman cu a aserca e director di APA pa haya sa con ta para cu e plannan di mudamento di waf, y e otro proyectonan rond di waf. Aki e director Boekhoudt a bisa cu tabata wardando asercamento di e minister nobo encarga cu e departamento aki pa wak si nan ta riba e mesun linja di pensamento.

Awor cu esaki ta estableci, tin cu sinta atrobe y wak con lo aplica e cambionan cu e gobierno actual ta desea, mirando cu nan no tabata di acuerdo con esaki lo tabata bayendo cu e gobierno anterior. Entre e problemanan tabata e forma con kier a deshaci di ASTEC, y tambe e plannan y compromisonan supuesto cu e gobierno y APA lo a sera cu varios parternan strategico. Algo cu semper APA y Gobierno a desmenti categoricamente, no obstante acusacionnan continuo di parti di esnan cu awe ta forma forma gobierno nobo.

Oduber no a bisa exactamente kico e cambionan lo por ta pa loke ta e mudamento di waf, mientras cu e ta aproba e plan di mudamento si. Den ki forma, mester keda estableci tambe. Interesante sigur ta e separacion di cartera entre dos minister pa atende ambos asunto esta di Turismo Crucero, y e parti mas comercial y operacional di waf, cu ta e parti di container. Esaki pues lo bai den man di minister Mike de Meza.