 ORANJESTAD – Segun Prakash Mungra di Banco Central, efectonan negativo di crisis riba sector financiero local te ainda ta relativamente limita. El a bisa esaki durante e seminario di pensioen cu compania di seguro Fatum a tene recientemente, banda di a papia di desaroyonan en cuanto AOV, a trata tambe e supervision di Banco Central di Aruba riba fondonan di pensioen y companianan di seguro. Otro topico di e seminario tawata e importancia di un pensioen sostenibel pa empresarionan, e asina yama ‘directeur-grootaandeelhouder’.
Segun Prakash Mungra di Banco Central di Aruba (CBA) nos isla ta conta cu 7 compania di seguro di pensioen na 2007 y 11 fondo di pensioen di empresa. E supervision di CBA riba companianan di seguro y fondonan di pensioen di empresa ta cay den e cuadro di ‘Landsverordening Toezicht Verzekeraars’ y ‘Landsverordening OndernemingsPensioenfondsen’.
Apart di esey ta conta un minimo di exigencianan di capital y solvabilidad, e sistema di vergunning, control di director y accionistanan, exigencianan di maneho, exigencianan pa contraresta labamento di placa y financiamento di terorismo y exigencianan di reportahe.
E Landsverordening Ondernemingsfondsen (LOP) ta deficiente y tin mester di modernisacion, Mungra ta opina. Pa e motibo aki CBA tin posibilidadnan limita pa haci un supervision efectivo riba fondonan di pensioen di empresa. E supervision actual di CBA ta consisti di analisis onsite y offsite y combersacionnan bilateral cu esnan envolvi. Pa cu esaki CBA tin diferente posibilidad di sancion y intervencion.
Segun Mungra te ainda e efectonan negativo di e crisis financiero internacional riba e sector financiero Arubiano, a keda relativamente limita. A consecuencia di e crisis, e grado di cubrimento di tres fondo di pensioen di empresa a baha bou di 100%. E fondonan aki entretanto a entrega nan plannan di recuperacion na CBA, di cual CBA lo sigui e desaroyonan minuciosamente. Mungra a bisa tambe cu e fondo di pensioen APFA no ta cay bou di supervision di Banco Central. Consecuentemente CBA no por eherce influencia riba recuperacion di e grado di cubrimento di APFA.
|
