|
RCA a propina Estrella su di seis derota den futbol Division di Honor |
|
Tuesday, 17 November 2009 |
 
NOORD- Cu e naranjadanan di Estrella ta den crisis, esey sigur por a keda confirma cu e derota di diadomingo atardi na man di e equipo di Solito cu e score 3 - 0. Un wega cu Estrella mester a gana, sino e lo bira dificil pa sali for di den sotano. Mester bisa cu RCA a domina Estrella por completo, esaki riba tur frontera, hugada mucho pura hunga y pasonan malo sinembargo tabata stroba RCA di crea atakenan peligroso. Na di 12minut, RCA a bay ariba 1 - 0 ora cu Steven Melchiot a los cañonazo durisimo cu a pasa ariba man di e potrero de Cuba. Despues di e gol ey RCA a lansa mas atake peligroso, hungando Estrella riba mitad tereno, pero nan a desperdicia gol tras di gol.
Na di 32min, Ale Aparicio a haya un bala den un contra-atake relampago ehecuta pa e tricolornan y aki inteligentemente Ale a lob e bala for di un distancia basta bon ariba e cabez di portero de Cuba, kende a mira esaki cai su tras pa e segundo gol pa RCA. Mester bisa cu e wega tabata uno limpi y e foulnan tabata profesional y nada di purba lesiona otro. Den e di dos tempo RCA a sali brabo, apenas un minut den e di dos tempo Eric Santos a anota gol number tres pa RCA na unda e defensa di Estrella a drumi por completo. Mucho mas no a pasa den e wega aki.
Notable ta cu Estrella tabatin solamente dos hungador di reserva ariba banki, cual ta di lamenta, un equipo grandi cu yen di talento den junioren. Nos ta kere cu a yega ora pa algo ser haci, prome cu ta lat. E proximo compromiso di Estrella lo ta contra e fuerte equipo di Deportivo Nacional, mientras cu RCA lo enfrenta e equipo sorpresa di e campeonato actual, esta Sportboys.
|
