E prome rond Jerrick a cuminsa na ataca Yvan, unda cu Yvan mester a wanta duro duro, pasobra Jerrick tabata kier a recupera su derota di october. Yvan tabata hopi bruha, pasobra e no a spera cu Jerrick lo a bira asina di bon den un rato di tempo, pero nan a lubida cu Alberto Klaber ta e trainer y coach na unda cu sigur esaki tin su impacto riba e atleta.
E prome rond a termina 2-2. Den e di 2 rond tabatin hopi atake di ambos bringador unda cu e puntacion tabata wordo anota sam, sam. E rond a termina 7-7. Aki mester a bay den sudden death na unda cu Yvan Moester a pone tur su energia y a logra di score net prome cu Jerrick Vluan. Pues Yvan a gana 10-9.

Aischal van der Linde tabata den un poule di 4 dama, na unda cu tur a bin pa e cabez di Aischal, pero mirando e trabou di e coach esey no tabata facil. E prome pelea Aischal a topa cu Xaviera  Sneek di Surinam.
Xaviera Sneek no tabata sa kico tabata dale y for di unda e skopnan tabata bin. Un Aischal cu tabata bon prepara pa su contrincantenan, no a laga ningun minuut pasa y a haci uso di tur su experiencia. E atakenan cu Xaviera Sneek tabata haya,  tabata mescos cu guerra mundial 2 di tanto skop cu a ser manda den su direccion.
E prome rond a termina 8-0 pa Aischal van der Linde. Den e di dos rond Aischal a wordo instrui pa bay mas suave, mirando cu e tabatin e pelea gana caba y e mester a start den final na bay mas trankil. E rond a termina  7-1 pa Aischal van der Linde, kende a gana pues cu e score total di 15-1.