ORANJESTAD – Miembronan di sindicato di polis SPA a haya splicacion amplio di ultimo desaroyo den cuerpo policial ayera mainta y a keda satisfecho. Den combersacion cu e presidente di e sindicato Guilfred Besaril, e la mustra Bon Dia Aruba cu basta asunto a keda trata durante e reunion di ayera mainta na nan sede na POVA. Entre nan e hecho cu a logra convence minister nobo di Husticia Arthur Dowers pa para e invoering di e lei pa e posicion huridico di e polisnan, basa riba e reorganisacion di anja 2003. Algo cu minister Dowers a bai di acuerdo cune.

Un di e puntonan tambe ta e asunto di e sentencia di hues cu sindicato SPA a haya riba e asunto di ranglijst. A splica e miembronan cu e abogado di e sindicato a splica cu e sentencia ta basa riba lei di Hulanda cu ta algo cu e hues na Aruba no a tene cuenta cu esaki. Como tal e recomendacion ta cu ta bai apela e sentencia. Algo cu e miembronan tambe a aproba ayera.

Mes momento tabatin otro asunto urgente cu ta e mando di polis cu ta tumando desicionan tocando funcionan existente den cuerpo a base di filosofia pa tin e ‘right man on the right place’. Den un mocion e miembronan tabata hopi cla cu e filosofia aki no por wordo practica. E coleganan a rechasa esaki den e forma actual te ora cu bin un clarificacion kico e spelregelsnan aki ta pa cada funcion.

Un otro punto ta e bishita di conocemento cu a trata cu e Minister di Husticia Arthur Dowers, cu a trata entre otro e posicion huridico di e polis, caminda cu a bisa cu tin 10 aña di reorganisacion sin cu e tin fin di caba. A pidi pa pone un fecha fiho pa esaki keda cla. Esaki a wordo duna na e minister pero e minister tin cu dicidi si ta bai hacie of no.

E otro topico ta enseñansa policial unda cu tin un documento di aña 2004 unda cu tin reorganisacion cu mester a tuma lugar. Pero tin e exigencia pa e opleiding cu ta wordo implementa den e funcionnan  nobo. Miembronan no ta contento cu esaki.

Un punto cu a haya atencion ta e condicionnan secundario pa polis. Sa cu e situacion financiero ta malo y como tal kier sikiera drecha e condicionan secundario pa haci e trabou mas atractivo pa ta un polis.