|
“Beach Team Holland” ta instala nan mas na beachnan di Aruba pa dos siman |
|
Friday, 20 November 2009 |
  ORANJESTAD (19 November, 2009) – “Beach Team Holland”, e Liga Profesional di beach volleyball cu ta agrupa tur e elitenan profesional Hulandes di beach volleyball, lo baha pa e beachnan bunita di Aruba for di prome pa 15 di december awor pa un sesion special di entrenamento. Beach Team Holland, encabeza pa e entrenadornan top Sakia van Hintum y Michiel van de Kuip, ta reuni tanto ekiponan femenino como masculino cu ta preparando pa e temporada internacional 2010.Parehanan top pa participa den e fase aki di entrenamento ta Reinder Nummerdor/Richard Schuil (ganadornan di 2009 Swatch FIVB su gira mundial na Den Haag), Emiel Boersma/Joppe Paulides y Sanne Keizer/Marleen van Iersel.
Atletanan top manera Marloes Wesselink, Daniëlle Remmers, Sophie van Gestel, Michelle Stiekema, Margo Wiltens, Cristiaan Varenhorst, Alexander Brouwer, Tim Oude Elferink y Jon Stiekema tambe lo cuminsa nan temporada trahando riba e santonan di Divi Beach Aruba prome cu e calendario 2010 cuminsa.
Aunke cu Beach team Holland tin un excelente facilidad di entrenamento bou di dak na su disposicion na Den Haag, cada oportunidad pa entrena pafor durante temporada di winter ta masha balioso, cu ta un necesidad pa hasta streanan top cu kier tin un chens den e competencia internacional creciente.
|
