|
Edad di 10 aņa y ya caba ta uza y bende droga den cura di scol |
|
Friday, 20 November 2009 |
ORANJESTAD—Abuso di droga y abuso di mucha ta bay man den man y tur instancia mester tin nan nanishi den e mesun direccion pa kibra e circulo vicioso aki. Awe ta comemora e di 20 aniversario di e Tratado di Derechonan di Mucha, y Comision Nacional pa Derechonan di Mucha hunto cu diferente organizacion ta poniendo hopi enfasis riba e necesidad pa nos comunidad ta mas conciente di kico ta derechonan di mucha.
Algun di e derechonan aki ta universal, pero otronan ta trata spesificamente e bienestar di muchanan, un bienestar cu ta nifica cu muchanan na Aruba tambe ta crece cu tur cuido, atencion, sin peliger, pa asina por desaroya tur nan potencial despues como adulto.
Sinembargo, nos mucha y hobennan ta confrontando mas y mas peliger, apesar di progreso economico. Un di e peligernan aki ta abuso di substancia, sea ta alcohol of droga. Pa tal motibo mes, Comision Nacional pa Derechonan di Mucha a organiza ayera un seminario pa tur instancia cu tin di haber cu bienestar di mucha y hobennan, enfocando riba droga particularmente. E presentacion tabata den man di Centro di Informacion pa Asuntonan di Droga, CIAD.
Sres. Janiro Eisden y Richnel Stamper di CIAD a duna un presentacion riba kico tur CIAD ta para p’e, durante un encuentro na e aula di EPI na Seroe Blanco, creando asina mas conocemento cerca e diferente instancianan cu ta traha directamente cu mucha y hobennan di e servicio importante aki, cu ta dirigi na preveni cu hobennan ta cay den e vicio di droga. Stamper a bisa cu ta necesario pa profesionalnan na Aruba sa kico CIAD ta haci y ta ofrece riba e problematica di droga memey di hobennan.
|
