|
Detencion den caso misterioso di maltrato |
|
Friday, 05 February 2010 |
 
ORANJESTAD – Ayera Bon Dia Aruba a informa den forma exclusivo e caso di un homber cu aparentemente a wordo maltrata te cu el a bay hospital, caminda el a keda interna den cuido intensivo, y sin ningun reaccion. Bon Dia Aruba a sigui traha riba e caso y por a compronde cu den oranan di dia ayera a detene e homber O.B., kende ta primo di e homber maltrata (J.W.). Informacionnan no oficial ricibi ta indica cu e sla ta uno cu no por a wordo causa door di un caida. Dokternan cu a examine na su yegada diarason anochi, a yega na e conclusion cu e sla e mester a haya tabata uno causa cu un obheto basta fuerte. Pues eynan a descarta e supuesto version cu el a subi palo pa horta coriente y el a cay.
Despues di a haci un investigacion profundo y intenso, a bin haya informacion cu un siman prome e victima JW a wordo menaza door di e homber O.B. cu e lo dale cu un bat si e sigui molestie. Y a base di esaki el a wordo deteni.
Pero tambe autoridadnan a haya informacion cu e sospechoso tabata na e sitio prome y despues cu famia a haya e victima inconsciente na cas. Pero di esaki no a haya informacion preto riba blanco ainda. Awe Recherchenan lo sigui cu investigacion di e caso. E victima mientrastanto ta den Cuido Intensivo ainda y a habri wowo pero no por logra comunica. E pronostico pa awor no ta mucho bon pe. Informacion cu Bon Dia Aruba ta dispone di dje tambe ta indica cu autoridadnan no a keda contento cu nan no a wordo poni na altura di e caso mesora. Ta te e siguiente dia un ruman di e victima a presenta na warda y nan a bin tende di e caso aki. Oranan balioso a bay perdi. Den casonan asina, hospital mester informa autoridadnan mesora.
|
