|
Turismo GLBT ta ofrece oportunidadnan enorme pa destinacionnan cu ta cla p’e |
|
Friday, 05 February 2010 |
ORANJESTAD—E por zona controversial, pero un di e poco mercadonan cu a mira crecemento turisticamente ta esun di personanan homosexual y pa motibo aki, destinacionnan no por cera wowo pa e realidad aki. Experto den Turismo Dr. Peter Talbot ta señala e punto aki, mustrando con por ehempel Ciudad di Mexico a dicidi pa bira un centro pa casamento entre pareha di e mesun sexo, cu ta indicativo di e poder economico di e mercado aki, cu ta conoci den e industria turistico como GLBT (gay, lesbian, bi-sexual and/or transgender). Dr. Talbot, un bon conoci di Aruba a bisa cu algun den e industria turistico ta mira e mercado aki como controversial y ta prefera di no traha cu n’e, mientras cu otronan ta mira e GLBT como un fuente grandi di crecemento y entrada.
Pa e ultimo aki, e mercado en cuestion ta ofrece hopi oportunidad. E pensamento tras di e filosofia (relativamente nobo aki) ta cu no ta enfoca riba e orientacion sexual, mirando cu esaki no ta un asunto di discusion publico |  |
| E atencion mester keda riba e elemento comercial y di negoshi. Ni cua posicion un hende po tin riba e mercado GLBT, hecho ta keda cu aki ta trata di un ‘niche’ cu a mustra crecemento constante den e sector turistico y cu no por keda ignora mas. Por ehempel, un investigacion na Merca a mustra cu e biahero GLBT ta gasta 1000 (mil) dollar mas durante su vakantie compara cu e biahero heterosexual, ademas cu e ta tuma mas vakantie en comparacion tambe. Den concepto di Talbot, turismo GLBT ta un realidad y como tal merece atencion di tur profesional den turismo y di biahe. |
CIFRANAN NO TA GAÑA
Analisisnan recent tambe ta ilustra e importancia di e mercado GLBT, specialmente durante periodonan di crisis economico. Mientras cu 61 porshento di heterosexualnan lo busca actividadnan menos caro pa motibo di e caida economico, e cifra den GLBT’s ta 51 porshento. Den e mesun analisis, como 32 porshento di e respondentenan heterosexual a mustra di lo scohe pa un asina yama ‘staycation,’ esta un vakantie na cas mes, pero a cambio unicamente 18 porshento di e GLBT’s a bisa di lo substitui un vakantie pa simplemente keda cas.
Pero kizas mas yamativo y ta demostrativo pa e balor di GLBT (Mericano) den e industria turistico ta refleha den e hecho cu: 97 porshento di miembronan di e comunidad GLBT a tuma vakantie na 2009; 57 porshento di GLBT a duna di conoce cu nan prefera di cumpra productonan y servicio cu ta keda den e nivelnan mas halto; 37 porshento di famianan GLBT ta biaha den exterior por lo menos un biaha pa aña; y 53 porshento di famianan GLBT ta gasta riba 5000 (5 mil) dollar pa persona pa vakantie.
Dr. Talbot ta reconoce cu no tur comunidad ta cla of kier atrae turismo GLBT, of tin e facilidad pa atrae e forma di turismo aki. Por ehempel, comunidadnan cu no tin hotelnan di nivel lo no tin e infrastructura apropia pa e mercado aki. Otronan lo prefera pa keda leu di e mercado aki pa motibonan cultural of religioso. Pero pa e destinacionnan cu si tin e facilidad y kier atrae e mercado aki, e ta importante pa tene cuenta cu diferente punto, e experto den turismo ta señala.
|
|
