|
Noticia cu ta circula cu nos mester ta den alerta pa posibel temblor y tsunami den region no ta berd |
|
Saturday, 06 March 2010 |
ORANJESTAD – No mester tin ningun motibo di panico pa cu un posibel temblor y tsunami den e region aki dentro di algun dia. Esaki ta palabra di meteorologo Marc Oduber na Bon Dia Aruba despues di a tende di rumornan di e noticia aki cu ta circulando rond e.o. na Aruba for di diahuebs atardi. E ta descarta esaki y ta mustra cu parti di e noticia ta berdad, pero e parti cu ta creando panico di un temblor mes ta fabrica. Ta trata di un noticia cu ta circula na Spaño unda cu ta bisa entre otro cu ‘.. tur venezolano mester ta den alerta segun expertonan di Chile, Mexico y Merca debi na e temblor cu a sacudi Chile recientemente di 8.8 grado riba scala di Richter. Esaki segun informacion di NASA ta mustra cu e lo a reduci levemente e duracion di dia y a desplaza e plato di tera cu 8cm..”
Esaki segun NASA su raportahe. E parti aki segun Oduber, ta cuadra cu berdad. Pero e parti cu ta sigui, no ta berdad. E ta bisa entre otro cu….” Debi na e situacion di e temblor, e suelo di Bolivia, Peru, Ecuador, Colombia, Brazil y Venezuela a keda instable y ta mantene nan mes den alerta pa un posibel sismo di magnitud 7.3 cu por activa un tsunami cu lo por afecta Caribe…”. E informacion ta sigui bisa cu ta conseha tur hende pa drumi cu paña bisti y cu yabi den man..”
Den combersacion cu Oduber, e la tuma contacto cu expertonan di Rikes University di Merca riba e informacion aki cu a mustra cu nan a desmenti e noticia di e parti di tsunami pa Aruba y region. Segun e expertonan mericano, e temblor di Chile enberdad tabata fuerte pero no di e fuerte ei cu e lo por tabatin efecto riba e plateau unda cu nos ta biba. Ta dificil pa bisa cu esei a haci e otro platonan rond di mundo instabil y cu pesei nos ta bai haya mas temblor. E noticia mes cu ta bayendo rond, no ta berdad.
E parti cu ta berdad di e parti di NASA ta cu e temblor di Chile ora cu e nasca plate bou di e south American plate a haci e efecto mescos ora cu un bailarina ta habri sera su man, cu e ora e speed di mundo ta cambia un tiki. E masa di mundo a fluctua e ora ei tambe y a move e balansa di e masa. E axis di mundo a varia di posicion y e dia a cambia di 1.2 micro seconde.
|
