ORANJESTAD- Hopi actividad deportivo! Esey ta loke nos a experiencia diahuebs ultimo, celebrando asina nos Dia Nacional Himno y Bandera. Den casi tur skina full rond di nos isla, por a mira un of otro actividad deportivo a ser organiza pa diferente club of organisacion deportivo. Mainta nos mes a cubri e careda di Ciclismo cu a sali for di Colony rumbo Estrella Club na unda esaki a start oficialmente. Despues nos a pasa St. Anna School na Noord, na unda e tercer edicion di e St Anna Loop a ser cori, e organizacion Arruwac a keda encarga cu esaki. E hoben Chester Hill a gana e St. Anna Loop pa di tres biaha consecutivo.

E di tres actividad deportivo cu nos a bishita tabata e torneo di futbol organiza pa e tricolornan di RCA, mas cu 8 equipo infantil y den atardi algun equipo veterano a forma di e torneo cu porcierto lo finaliza mayan diadomingo. Rapidamente despues di RCA nos a sigui pa Parke di baseball di Ripoldo Croes na Piedra Plat unda e organisacion di Grasshoppers a organiza un torneo di baseball infantil combina cu weganan popular como tambe domino.

Despues di merdia nos a bishita e competencia internacional di Paintball, na unda Hot Triggers a organiza esaki riba e cancha nobo di paintball na Parkietenbos, un delegacion di Venezuela tambe a forma parti di e mainta aki. Despues nos a sali pa e evento di Botonan Miniatura na unda Aruba Mini Sailboat a organiza un careda internacional cu a conta cu participacion di Bonaire.