ORANJESTAD  - Un palo di awasero a cay ayera merdia pabou di brug  cu a gara hopi hende aki na Aruba di sorpresa. Den apenas un ora, gran parti di e parti afecta na Aruba a keda inunda cu awa, y trafico na Playa, y varios otro area tabata un dolor di cabes pa trafica. Sigur cu un bapor crucero den waf, cu no a facilidad cosnan mucho tampoco. Por a mira un biaha mas con un yobida ‘cortico’ por a causa tanto problema di awa, y atrobe na e  mesun camindanan di semper. Ta apenas e siman aki ainda DOW a pidi pa yuda coopera cu limpia riool y tambe tankinan pa evita cu tin problema ora cu yobida cuminsa.

SAN NICOLAS- For di Kentucky Louisville U.S.A.  nos ta ricibi e bon noticia cu Shanayah a titula American National NBL Sub Champion 2010.
Durante di e Grands (sierre di aña 2010) Shanayah mester a pone tur di su parti mirando cu e no a bay prepara y tampoco den e nivel (shape) cu nos conoce Shanayah.
Despues cu Shanayah a regresa for di Sur Afrika dia 5 augustus 2010 no por a train su gate (salida) debi cu e gate na Aruba no ta funcionando. Pues logicamente su curpa no ta optimal pa careda tampoco. A evalua hopi prome cu a dicidi pa Shanayah biaha toch. Mirando cu Shanayah tin e smak y ta pone tur di su parti y profesionalnan Mericano a priminti cu lo duna Shanayah clinics urgente manera cu e yega Merca den dos dia di tempo prome cu evento magno di BMX,  a dicidi di laga Shanayah bay Merca toch. Segun tata di Shanayah hopi a comenta "It's always a shame to see talent go to the waste".  Otro a bisa " Who is so brave to come to the Grands without training there gate or racing in a month. Expertonan a haci nan lo mihor pa pone Shanayah sikiera den un nivel pa competi. Mirando cu Shanayah tin un super abilidad a logra pone Shanayah den tempo record den un nivel pa por competi. No 100% pero un 70 pa 75%. 

ORANJESTAD – E siman aki e  ehecutivonan di Fondo Monetario Internacional (IMF) ta di bishita na Aruba. Durante e encuentro aki, e ehecutivonan di IMF a reuni cu e comision fiho den Parlamento. Durante di e encuentro aki e comision di Parlamento encarga cu finanzas y economia, a vocifera nan pensamento riba e desaroyonan di e pais aki. IMF cada dos aña ta traha un rapport riba cada pais, pa analisa nan situacion financiero economico. Durante nan bishita, e ehecutivonan di IMF a reuni cu miembronan di Parlamento di partido MEP tambe. E reunionnan ta tuma luga den Banco Central, cu e diferente organisacionnan. Durante e encuentro IMF ta trata cu diferente actor, specialmente di parti di gobierno, tambe gremio comercial, sindical, oposicion, pues nan ta papia cu diferente instancia pa haya nan opinion riba e situacion financiero economico di e pais.

ORANJESTAD – E siman aki e  ehecutivonan di Fondo Monetario International ta di bishita na Aruba. Durante e encuentro aki, e ehecutivonan di IMF a reuni cu e comision fiho den Parlamento. Durante di e encuentro aki e comision di Parlamento encarga cu finanzas y economia, a vocifera nan pensamento riba e desaroyonan di e pais aki. Comision fiho den Parlamento relaciona cu e aspectonan financiero economico tabata tin un reunion cu Fondo Monetario International  (IMF). IMF cada dos aña ta traha un rapport riba cada pais, pa analisa nan situacion financiero economico. E reunionnan ta tuma luga den Banco Central, cu e diferente organisacionnan. Durante e encuentro IMF ta trata cu diferente actor, specialmente di parti di gobierno, tambe gremio comercial, sindical, oposicion, pues nan ta papia cu diferente instancia pa haya nan opinion riba e situacion financiero economico di e pais.

ORANJESTAD – Comunidad di Aruba y AZV, no solamente na Aruba, ta bisa hopi biaha cu Hospital ta un buraco sin pos cu ta costa mucho hopi placa y cu ta hinca hopi placa sin cu tin siguransa kico ta haci cu e placa aki. Segun director di hospital Arnoud Boesten, esei ta algo comprendibel si bo no mira mas cu e pashent cu ta keda algun dia hospitalisa, haya un recibo halto cu tin cu wordo paga door di AZV. Como tal hospital ta wordo acusa cu e no ta transparente y no eficiente. Algo cu e director den un combersacion cu e matutino aki, ta refuta.
 
Segun Boesten, e hospital en realidad ta e negoshi mas transparente di Aruba. Semper na comienso di aña tin un presupuesto di hospital cu ta wordo manda pa AZV y minister encarga. Den e presupuesto ta detaya di kico e gastonan regular di hospital ta consisti pa e aña ei. No solamente cuanto lo gasta na remedi sino tambe cuanto gastonan di cuminda y tambe di limpiesa lo ta. Tambe pa gastonan extra cu AZV ta pidi tur aña ta hinca den e presupuesto. Den e presupuesto ta poni tambe cuanto pashent ta premira cu lo bishita e hospital y cuanto esaki ta bai costa AZV.

SANTA CRUZ- E organizacionnan di baseball cu ta pertenece na Center League ta buscando muchanan entre edad di 4 pa 8 aña pa caba di forma rosternan pa e campeonato nobo cu lo ta cuminsando pronto. Muchanan cu ta interesa pa drenta baseball por acudi na diferente terenonan den Center League. E equipo den nomber di Deloitte cu ta edad 4-6 ta train na veld di Rockets (pariba di Botica Centraal), tambe e equipo di 7-8 tambe tin lugar pa mas mucha. Si sigui bai mas pariba den St. Cruz tambe awor tin un equipo den nomber di Blue Stars cu tambe ta buscando mas mucha pa hunga baseball, nan ta train na nan propio veld yama Blue Stars, e veld ta keda na Sabanilla Abou pariba di e veld di Sportboys, tambe ta equipo di 4-8 aña. Otro equipo ta QCC Quality Chiropractic Clinics, cu tambe ta participando na e campeonato nobo y tambe ta buscando mucha di 4-8 aña y ta train na veld di Union, enfrente di Centro di Husticia na St. Cruz y na Dragon Hitters Ballapark.

CARACAS- Dialuna mainta trempan a sali pa Venezuela, cinco  5 di nos hoben peloteronan, kendenan ta  Ixomar T. Schuilenburg, Marvin Brown,  Joewayne Gumbs, Francisco A. Taveras Moreta y Darwin Escobar Romero, kendenan a wordo acompaña pa  e biahe aki pa un representante di e conocido ex pelotero di Liga Grandi, esta Luis Polonia, esta sr.  Julio A. Hernandez. E grupo di peloteronan aki, a wordo invita  pa participa na sessionnan di su e academia di baseball na Venezuela, cu ta ser maneha y supervisa pa Luis Polonia y su grupo di asistentenan. E organización di Luis Polonia a cubri tur gasto pa e muchanan por a yega Venezuela y bin bek y  tambe ta encarga cu estadia y necesidadnan di e peloteronan.

Intencion di e proyecto tremendo aki di Luis Polonia, ta pa sigi prepara e muchanan aki pa aumenta nan capacidad  basebolistico pa nan bira posibel prospectonan di baseball y kendenan despues lo por firma cu organizacionnan di Liga Grandi. Sin duda algun un tremendo oportunidad pa e hobennan aki, ya cu e session aki ta habri posibilidadnan grandi pa tur e hobennan aki.
Hopi exito na nos muchanan di Aruba. Riba e foto por mira e cinco hobennan cu  a bai participa na preparacion unico aki na Venezuela y na man drechi por mira e representante di Luis Polonia, esta Julio Hernandez, kende a acampaña y regla tur cos pa e hobennan.