DEN HAAG (AP) — Eerst Kamer a aproba e ley controversial diamars unda tur adulto na Hulanda automaticamente ta donor di organo. Si nan no kier esaki, nan mester tuma accion pa informa gobierno.

Tabatin un mayoria di sosten chikito pa pasa e ley. Aña pasa Tweede Kamer tambe a pasa e ley cu un mayoria hopi chikito (di un voto mas). E iniciado di e ley esta Pia Dijkstra (partido D66, conoci tambe como ex locutor di noticia, riba potret) a comenta cu e ley nobo ta similar cu tin caba na Belgica y Spaña. Bou e sistema nobo tur persona ariba 18 aña kende no ta registra ainda como donor, lo ricibi un carta puntrando si nan kier duna nan organo despues di muri.

“Nan por contesta cu si of no of cu mi yiu lo dicidi of cu un otro persona lo dicidi”, asina sra. Dijkstra ta bisa den un declaracion. Esunnan cu ta keda sin contesta lo ricibi un di dos carta seis siman despues. Si esaki tampoco ta wordo yena y manda bek, automaticamente e persona lo wordo registra como donor. Pero e opcion ta keda pa e persona cambia nan status.

Den un reaccion e fundacion di riñon Hulandes ta bisa cu e pasamento di ley ta un paso grandi pashentnan riba e lista di espera. Nan ta bisa cu den otro paisnan cu sistemanan similar e cantidad di registracion di donor di organo a subi.  E ley nobo ta nifica cu hopi pashent ‘lo haya nan bida y libertad bek’, segun e presidente Tom Oostrom di e fundacion.

Aruba tambe ta probecha
Na 2016 Bon Dia a publica un articulo riba e efectonan pa Aruba di e ley Hulandes aki. Unda e conclusion ta cu nos pais tambe ta probecha di e sistema nobo Hulandes. Pero cu nos mes no por contribui na donacion pa Hulanda pa motibo tecnico y etico.

E calculacion ta cu e ley nobo ta conduci na un aumento di 25% di donacionnan di organo. Unda anualmente alrededor di 3 pa 5 di nos Arubianonan ta wordo beneficia anualmente cu un transplante di riñon.

Ley di AZV ta inclui tres tipo di transplante cu nos seguro medico ta cubri, nan ta: transplante di riñon, cornia y esun di merg di weso. E programa di transplante particularmente di riñon a cuminsa basta aña pasa. Segun datonan di AZV, na aña 2009 aña, 9 pashent a haya un donacion di riñon na Hulanda. Na 2010 el a bira 3; pa 2011 el a bira 6; pa 2012 el a bira 4; pa 2013 el a bira 2 y pa 2014 el a bira 5.

Na 2009 AZV a paga 1.642.141 miyon pa concepto di transplante di riñon so. Na aña 2011 e costo total tabata 1.420.681 florin; y na 2013 dos pashent di Aruba a haya transplante di riñon y e costo total tabata 306.735 florin. E costo promedio pa un transplante ta diferente den cada caso, pero e ta alrededor de 200 mil florin.

Ta wordo calcula cu for di 1997 te awor, 49 pashent di Aruba a haya un donacion di riñon na Hulanda. Actualmente Clinica di Dialisis ta trahando cu entre 10 pa 15 pashentnan pa bay riba lista di candidatonan pa haya un transplante di riñon na Hulanda. Sinembargo na Hulanda cada aña 150 persona cu ta wordo inclui den e lista pa warda riba un transplante ta muri, prome cu nan deseo di bida lo por bira un realidad.

Dificil
Na 2016 Romeo Kock kende ta internista y nefroloog na servicio di e Clinica di Dialisis den Horacio Oduber Hospital (HOH) a bisa Bon Dia cu nos isla ruman Corsou tambe a yega di pensa riba con nos por haci pa yuda y bin cu donantenan di nos region.

Nan a acerca Hulanda y nan a papia cu e fundacion encarga cu transplante pa wak kico ta posibel. “Ta fastioso pa bo ta den un posicion cu bo ta haya so; y bo no ta duna. Te hasta nos por pensa cu como nos ta contribui, eventualmente nos hendenan por haya un organo como donacion mas lihe.” Pero pa motibonan practico y tecnico y etico e conclusion ta cu e ta keda hopi dificil pa nos aki banda por contribui tambe.

Sr. Kock a laga sa cu ora su colega di Corsou a acerca Hulanda, y nan mes a haya como contesta cu ta preferibel pa no haci esey. Pero tempo ta cambia y mas tecnologia lo bin acerca, y nos no sa si aki un par di tempo e posibilidad cu Aruba por bira un donor di organo pa Hulanda lo bira factibel, asina el a conclui na october 2016.