Home Regional Mexico: Muraya di Trump lo no resolve tur problema

Mexico: Muraya di Trump lo no resolve tur problema

280

Durante un bishita di trabao na Ciudad de Mexico e director interino di e Agencia Antidroga di Estadonan Uni (DEA), Robert W. Patterson, a bisa cu e muraya na frontera no lo termina cu e problema di narcotrafico pasobra “e cartelnan ta ingenioso y lo sigui busca manera”, pero ta di acuerdo cu e ta forma parti di un esfuerso cu ta bale la pena.

“Ta miho pa tin algo na luga di tin nada”, Patterson  a bisa den conferencia di prensa, pero el a sigura cu e muraya no lo ta suficiente pa desmantela e gruponan criminal. E strategia, di acuerdo cu e funcionario Mericano, ta consisti di persigui tur integrante di e gruponan di narcotrafico y no e lidernan so. “Nan ta obhetivo importante, pero e realidad ta cu remove e individuo ey ta laga un bashi, y despues bo ta mira e violencia cu e ta trece cu esaki”, el a menciona.

Patterson a sigura cu gobierno Mericano sa cu tin un problema den demanda di droga y pa combati esey, Merca ta enfoca riba tres aspecto. E prome ta consisti di inverti den educacion pa reduci e demanda di narcotico. E di dos ta continua cu e apoyo di polis y militar pa siguridad y aresto di e delincuentenan y, manera el a indica den e di tres punto, disminui e suministro di droga.

Encuanto intercambio di informacion entre ambos nacion pa combati e gruponan criminal, Patterson a menciona cu ‘mester hacie 100% y di manera reciproco’, y a sigura cu e cooperacion cu Mexico ta solido.

El a añadi cu no ta importa unda ta detene e  delincuentenan, pasobra tin tambe paisnan Europeo cu ta busca con pa caba cu narcotrafico.  “Awor nos ta comparti evidencia, y loke nos ta trata di haci ta saca placa di nan”, el a indica.

Riba pregunta encuanto funcionarionan Mexicano deteni pa corupcion, desvio di recurso y actividad ilicito, Pattersona responde cu esakinan ta pio cu e criminalnan mes, y cu si nan caso yega corte Mericano, nan lo ser husga pa ley.

“E personanan den puesto publico di confiansa y cu ta viola esaki ta hopi pio cu e propio delincuentenan, pasobra nos ciudadanonan mester por confia den e sistema.”