Parlamentario Sue-Ann Ras (MEP) no tin miedo di cuestiona coleganan den fraccion.  “Nos como sociedad tin cu ta mas critico,  y nos como parlamentario mester educa pueblo enbes di lastra otro den lodo na parlamento.”

Combersando cu Sue-Ann Ras, parlamentario di fraccion di MEP, Bon Dia kier a haya sa con e status un bes mas ta cu e plan di crisis social na Aruba cu gobierno a institui y aparta un suma pe, manera nos a publica anteriormente.

Pero mirando cu no tin bon bista riba esaki te ainda, nos a combersa cu e parlamentario riba e rol importante cu educacion tin pa lanta un pueblo critico, como tambe e rol importante cu parlamentario tin pa duna data na prensa cu por comparti esaki cu comunidad. “Parlamentarionan mester ta ekipa pa educa pueblo riba kico ta e tendencia andando den sociedad contemporaneo.”

69% di poblacion riba nivel di mavo bay abou
Loke sra. Ras ta bin ta señalando pa hopi tempo y ta un preocupacion grandi ta cu e sistema di enseñansa no ta traha optimalmente. Esaki mirando tendencianan estadistico manera e echo cu segun CBS, den 2010 un 69% di poblacion di Aruba ta educa na nivel di Mavo, scol basico of no tin scol mes.

Esaki segun sra. Ras ta contribui na e manera con ‘nos hendenan ta bay tras di fake news’. E parlamentario ta señala tambe na e manera con ora personanan mira of lesa cosnan riba medionan social, ta acepta tur cos como realidad sin cuestiona. Den esaki sra. Ras ta wak su rol como parlamentario uno unda mester enfoca riba busca documentacion y cifranan cu por mustra kico ta e realidad cu nos isla ta biba.

“Unabes bo cuminsa traha bon riba educacion, bo ta wak cu hopi otro cos ta cuminsa drecha. Nos mester enfoca riba crea hende critico. Nos mester tin hende cu ta analitico y ta busca pa sa mas. Un ehempel como parlamentario mes ta si mi partido bin cu un ley y ami ta simplemente aproba. Esaki no mester ta asina. Si mi partido bin cu un ley, mi kier sa dicon a bin cu esaki, cua ta e intencion y e beneficionan pa pueblo. Si bo no por convence mi e ora mi no ta bay di acuerdo cu esaki.”

‘E rol di parlamentario pa hopi aña tabata ja-knikker’
Sra. Ras a referi na diferente rapport cu el a laga nos tira bista riba dje cu pa añanan tabata señala e problema social cu ta creciendo riba nos isla. El a mustra nos diferente datonan cu pe a cende un alarma di biaha, pero cu e parlamento anterior no a tuma na pecho. Un ehempel di esaki ta un rapport traha na 2012 pa Departamentonan di Asuntonan Social, cual ta detaya hopi problema social na nos isla y e desaroyo di esakinan.

“Ami no ta kere cu e parlamento e tempo ey por a wak un rapport asina y ora e gobierno anterior a dicidi di stop tumamento di personal den instancianan social y corta e presupuesto social cu nan tabata haciendo nan trabou.”

Pero esaki ta bay mas leu cu tira lodo riba otro politiconan, pasobra sra. Ras ta subraya cu ora un persona bira parlamentario ‘nan mester realisa cu bo no ta MEP, bo no ta AVP, bo no ta RED, bo ta Aruba ora bo ta ki den’.