Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua diasabra atardi riba veldnan na Pos Chiquito. Manera ta conosi e serie final di best out of 5 a inicia diabierna ultimo unda e serie ta empata 1-1. Diasabra anochi sinenbargo mester accentua cu den un tremendo wega di softball Aruba Bank Lady Tigers ta derota Jaguars Vitamin Water cu e score di 6-5 pa lidera e serie awor 2-1. Boxscore final Aruba Bank Lady Tigers 7 careda, 7 hit, 1 error. Jaguars Vitamin Water 6 careda, 9 hit, 7 error cual sigur a pisa enorme riba e resultado. Rudlyn Ras kende ta drenta releva Mandy Angela den di 4 inning ta resulta pitcher ganador. Melissah Daniel ta bay cas cu e derota.
Bunita wega unda Zuleika Peña ta conecta un cuadrangular den deep centerleft pafor di cura den di 6 inning cu un coredor na base pa bolter e score mandando Jaguars ariba 6-5 dunando indicasion cu Jaguars lo bay cu un otro victoria. Aruba Bank sinenbargo no kier entrega y Riangela Flanegin ta conecta un cuadrangular pa empata e wega 6-6 y den di 7 inning Aruba Bank ta logra e victoria di 7-6. Mihor bateadornan pa Aruba Bank Lady Tiger ta Riangela Flanegin y Meraly Kootes ambos di 3-2. Pa Jaguars a destaca na bate Zuleika Peñ di 4-3. Diadomingo e dia siguiente esta 3 di December lo hunga wega number 4 y si ta nesesario wega desisivo number 5 pa asina determina kende lo ta campeon di Aruba den categoria AA femenino. Softball fastpitch den pleno accion.
