Lider di POR, Otmar Oduber a mira un clausura di campaña fructifero den cuadro di eleccion di diabierna awor. Un campaña pa consolida nan partido como e di tres forsa politico di nos pais.

Despues di 43 aña segun sr. Oduber Aruba ta bay conoce un di tres forsa politico nobo. El a argumenta cu POR no ta djis un partido nobo, ya cu tin varios partido nobo den eleccion aki, pero e biaha aki tin un forsa nobo. Segun e, e partido aki a wordo lanta fei anhelo di pueblo pa reprocha loke nan a conoce durante 43 aña bou e partido gel y bou e partido berde.

POR a haci un diferencia den un forma cu nos a trece cantidad di innovacion den politica, segun e politico y ex minister. E ta contento cu e influencia ey a pone cu cierto momento tambe otro partidonan politico por tuma esaki over.

Na 72 ora di eleccion venidero, e veterano politico a gradici tur hende cu a sostene nan actividad di clausura cerca nan candidato Alan Howell na Mabon y esunnan cu a participa activamente den e parada di diasabra ultimo.

Tambe el a duna danki na e comunidad di Aruba cu henter e periodo di campaña politico a sa di habri nan porta pa scucha nan ideanan y plan di gobernacion. Sr. Oduber a bisa cu POR a bin cu un politica nobo buscando un cambio berdadero.

Meta politico
El a bisa definitivamente nan a logra e meta cu nan a pone nan dilanti pa e politica na Aruba tabata mas concentra ariba e aspecto di contenido di e partidonan politico. Un politica totalmente diferente na esun tradicional y popular conoci pa basta aña na Aruba, el a bisa.

E ta haya cu cada eleccion tin su particularidad y ta diferente na otronan celebra den pasado. Pero e campaña ultimo aki cu a conclui a wordo caracterisa caminda e fluho di informa y educa e comunidad tabata un di e prioridadnan di nan partido.

Sr. Oduber a indica cu nan tabata e prome partido cu a pone un plan di accion riba mesa caminda cu nan a consulta comunidad y gremionan. Tambe durante 6 siman largo nan tabata receptivo pa ricibi e comentarionan fei comunidad. Igualmente el a bisa cu nan tabata e prome partido cu a pone un berdadero programa ariba pia y entreg’e na comunidad.

Tambe el a aclaria cu POR ta un partido riba su mes y independiente di AVP y MEP, ya cu el a yega di tende cu POR ta un extension di AVP of un extension di MEP, locual el a nenga rotundamente.

Tambe el a gradici su demas coleganan cu ta ariba lista di POR pa nan empeño y esfuerso cu a wordo haci durante e lunanan intensivo di campaña prome cu electoral. El a gradici e miembronan di prensa, esunnan cu no tabata comprometi pa informa y forma parti di e democracia di nos pais, el a bisa.

El a declara cu diabierna awor dia di eleccion pueblo votado tin un escogencia hopi importante pa loke ta trata futuro di e pais aki.

Un escogencia cu ta bay determina e liderazgo cu mester tin pa e proximo cuater aña akinan na Aruba”, el a bisa. E lider di POR a agrega cu e escogencia aki lo determina esunnan cu mester hiba e control den parlamento cu mester percura pa e felicidad di cada famia riba nos isla.