Maneho pa promove artesania local

Manera Bon Dia ta bin ta haci pa algun tempo caba ta siguiendo e desaroyonan na Welcome Plaza. Ultimamente a tuma nota cu un maneho ta bay wordo fiha pa promove artesania bou e dak di e kiosconan uzando criteria di Unesco pa duna preferencia na artesano of artista cu tin reconocemento di e Seyo Nacional pa Artesania.

Den un comunicado cu nos a haya recien di ministerio di infrastructura y medio ambiente, a delinea den liñanan grandi kico e maneho nobo ta encera pa percura cu artesanonan haya preferencia pa haya luga na Welcome Plaza mirando preocupacionnan bou algun artesanonan cu ta expresa cu ‘artesania na Aruba ta cabando’.

Nos a tuma contacto cu mandatario encarga cu infrastructura y medio ambiente Otmar Oduber (POR) kende a splica kico tabata e trayectorio y motivacion envolvi pa bin cu un maneho pa e area, cual segun e mandatario no a wordo delinea pa e minister anterior.

Sr. Oduber a conta Bon Dia cu e manera con e mandatario anterior a cera contract cu ‘friends & family’ no tabata corecto. Segun e mandatario, te na november a cera contract cu 18 persona na Welcome Plaza pa asina percura pa nan haya un luga den e localidad nobo e mandatario a manda un carta pa e personanan cu a haya un promesa di gabinete anterior pa splica cu nan no lo haya un luga reserva mirando cu e minister anterior nunca a fiha un maneho pa e area di Welcome Plaza, segun sr. Oduber.

Specialmente e manera con segun e mandatario a purba fix luga pa coordinadonan y amigonan tabata e rasonamento pa anula e promesanan. Segun minister di infrastructura, e grupo di persona aki lo a haya mita di e kiosconan cu a keda construi recien, mirando cu en total tin un cantidad di mas o menos 39 kiosco. Mientrastanto e personanan cu tabata den warda pa muda di e kiosconan bieu panort banda di Arubus si a wordo considera, pues nan a move di biaha.

Esaki a wordo haci pa por tin un maneho enfoca riba stimula artesania di hende local por medio di duna nan oportunidad pa haci negoshi dilanti e terminal di crucero. Den cuadro di e maneho aki artesano local y artista local cu tin un Seyo di Artesania, cual ta un certificacion otorga pa Departamento di Cultura (DCA), lo por haya prioridad pa bende productonan den kiosconan na Welcome Plaza.

’Welcome Plaza a bira un flea market’

Manera nos a publica anteriormente, un di e poco artesanonan local cu ta bende su producto y producto di otro artista local na Welcome Plaza ta haya cu e kiosconan na e area nobo ta ‘birando un flea market atrobe’. Aunke artesano local Trudy Lampe a expresa cu podise turistanan ta wordo atrai pa loke mayoria di luga ta ofrece na producto importa, e situacion pa e artesanonan ta hopi mas precario.

E situacion aki ta wordo causa, manera algun artesanonan ta expresa, pa via di e mercado cu ta hopi inhusto. Varios artesano di antes a stop di traha awor.  Actualmente tin un trend cu a cuminsa, pero segun sra. Lampe, ta masha tiki hende local mes ta haci e trabao aki di artesania di Aruba, cual ta carga realmente e sentimento di e isla. “Bo por conta riba bo man cuanto tin.” Esaki ta wordo contrasta segun sra. Lampe pa e situacion unda productonan di artesania ta wordo treci di afo y simplemente ta skirbi Aruba riba nan, mientras e tipo di souvenirnan aki por wordo haya den cantidadnan masal na tur destinacion turistico. E unico diferencia ta e nomber di e luga cu ta wordo skirbi riba dje.

Minister di infrastructura di su banda a bay di acuerdo y ta duna rason na loke sra. Lampe a expresa, bisando cu ‘en berdad aworaki e luga a bira un flea market unda ta bende cantidad di producto cu no ta wordo traha na Aruba, y esey nunca tabata meta di Welcome Plaza’.

Criterionan

Un di e maneranan con lo bay evalua si un persona por haya preferencia pa haya un luga na Welcome Plaza ta por medio di e Seyo di Artesania, cual por aplica pe na DCA via un comision special cu ta evalua productonan di artesania y arte. Apart di esaki segun minister, pa personanan sin Seyo lo evalua segun cierto criterionan estableci pa Unesco cual ta delinea ki ora un arte of artesania ta di importancia pa herencia cultural di un pais. Esaki ta un evaluacion cu ta wordo haci na departamento di Infrastructura y Planificacion (DIP). Nos a acerca Unesco cual a duna nos un rapport general riba e desaroyo di artesania pa importancia di herencia cultural.

Huur

Sinembargo no ta sigur con hopi e cambionan aki lo por yuda mirando cu e huur pa un kiosco na Welcome Plaza segun cierto personanan cu ta estableci ey ta demasiado halto pa e benta cu nan ta haya. Nos a acerca e sr. Oduber kende a reacciona bisando cu e no a tende nada riba e prijs di huur. Esaki a wordo fiha prome cu el a tuma mando di e ministerio. Pero si lo por haci algo tocante esaki sr. Oduber a splica cu ‘lo mester laga DIP evalua e situacion, mirando cu nan tin un luna so ta paga’.