Diadomingo ultimo, Aruba Triathlon Association a organisa nan prome competencia di aña cu e Warm-UpTriathlon na Boca Catalina. Un total di 96 tri-atleta a competi cu otro den e tres disciplina, esta landamento, ciclismo y coremento. Notabel ta cu tabata tini un total di 14 atleta di e barco Freewinds cu tambe a bin participa na e Warm Up Triathlon. Mester bisa cu e grupo aki a bin cu nan mesun ekipo di filmacion y fotografo pa cubri full e evento. Den e categoria Sprint a participa 41 atleta individual y 10 team di relevo. E tri-atletanan distancia Sprint mester a landa 750 meter, core un distancia di 20 km riba bais y sigui cu un careda na pia di 5 km. Categoria Super Sprint a landa 375 meter, core un distancia di 10 kilometer riba bais y despues continua cu un careda na pia di 2.5 km. Na final tur esnan presente por a mira un Sprint sublime entre Sean Toppenberg y e hoben Giannon Eights na unda e prome ta gana e evento den un tempo di 1:09:04.194.
