E seleccion di tennis femenino hubenil lo competi den e asina yama Junior Fed Cup na Sto. Domingo, Republica Dominicana te cu 17 di februari. Esaki ta informacion for di un relato di e fundacion Lotto pa Deporte.

E competencia lo conta cu un participacion di e miho atletanan femenino hubenil procedente di 11 pais den America Central y Caribe. E seleccion di Aruba lo consisti di atletanan Kayla Solagnier, Aethielle Kelkboom y Jelsyvette Croes mientras como coach lo fungi Harry van Reek. Aruba ya pa algun aña caba ta participa den e Jr Fed Cup cu aña pasa a tuma luga na e pais di El Salvador. “Tur tres atleta tin nan experiencia na nivel internacional tanto den exterior y torneonan teni na Aruba mes. Ainda e seleccion femenino ta buscando di triunfa cu e premio maximo. Na aña 2015 e deporte di tennis a conoce un di nan miho resultadonan den nos region na momento cu e seleccion masculino hubenil a logra gana e torneo di Davis Cup Junior na El Salvador. E aña aki e federacion di tennis Arubano, ALTB a dicidi di manda un seleccion femenino representa Aruba”, segun e relato.