Home Breaking News Varios arma di candela, droga y placa confisca na Saliña Cerca despues...

Varios arma di candela, droga y placa confisca na Saliña Cerca despues di entrada hudicial

2514

Afpakteam a tene un accion grandi conhuntamente cu Marechaussee (Kmar) y Ministerio Publico di Hulanda. Den cuadro di e accion aki, a tene un huiszoeking/entrada hudicial riba 7 di februari ultimo den oranan di mainta den un villa na Saliña Cerca.

Durante e entrada hudicial, autoridadnan a confisca droga, varios arma di candela y un cantidad di cash. Ademas a confisca tres auto y tres scooter. E villa mes tambe a keda confisca. Dos detencion en total a wordo haci. Un sospechoso ta Arubano y e otro naci na Curacao. E Arubano ta sospechoso di husticia di Aruba. E otro sospechoso a keda deteni riba peticion di husticia Hulandes.

E investigacion ta andando keto bay segun Ministerio Publico ta informa.

Tur e beslag lo cay na e fondo di combatimento di criminalidad (Criminaliteitsbestrijdingsfonds). Placa di e fondo aki ta wordo uza pa promove combatimento di criminalidad. Di e manera ey e ganashi di e accion aki ta cay directamente na benificio di Aruba. Afpakteam kier aporta na un forma visible na e fondo.

Afpakteam ta un cooperacion di Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht di Aruba, Meldpunt Ongebruikelijke Transacties (Meldpunt) y RST. Afpakteam a cuminsa traha prome di maart 2017 y ta dedica su mes na combati criminalidad financiero-economico.

Pa tuma contacto cu Afpakteam: afpakteam@kparuba.com of via tiplijn na 11141.